പന്നിയിറച്ചി പാചകം ചെയ്യുന്നത് ടിക്ടോക്ക് വഴി കുക്കിംഗ് വീഡിയോ കാണിച്ച യുവതിയ്ക്ക് ഇന്തോനേഷ്യയിൽ അഞ്ച് വർഷം തടവ് . ലിന ലുഫ്തിയാവതി എന്ന യുവതിയെയാണ് മതനിന്ദ കുറ്റം ചുമത്തി ശിക്ഷിച്ചത് . ഒരു പ്ലേറ്റ് ചോറും പച്ചക്കറികളും ക്രിസ്പി പന്നിയിറച്ചിയുമായി പാചകം ചെയ്യാനിരിക്കുന്ന ലിനയുടെ വീഡിയോ സോഷ്യൽ മീഡിയയിൽ വൈറലാണ് .
“ബിസ്മില്ലാ, പന്നിയിറച്ചിയെ കുറിച്ച് എനിക്ക് ജിജ്ഞാസയുള്ളതിനാൽ എന്നെ എന്റെ കുടുംബത്തിൽ നിന്ന് പുറത്താക്കുമെന്ന് ഞാൻ കരുതുന്നു,” ഷൂട്ടിംഗിനിടെ ലിന ചിരിച്ചുകൊണ്ട് ക്യാമറയ്ക്ക് മുന്നിൽ പറയുന്നതും കാണാം .13 ദശലക്ഷം വ്യൂവേഴ്സിനെയാണ് ലിനയ്ക്ക് ഈ വീഡിയോയ്ക്ക് ലഭിച്ചത് . രോഷാകുലരായ ഇസ്ലാമിസ്റ്റുകളുടെ നിരവധി കമന്റുകളുമുണ്ടായിരുന്നു .
വീഡിയോ വൈറലായതിനു പിന്നാലെ വീഡിയോ മതനിന്ദയായി കണക്കാക്കുന്നതായി ഇന്തോനേഷ്യൻ ഉലമ കൗൺസിൽ ഫത്വയിൽ പറഞ്ഞു. ദക്ഷിണ സുമാത്രയിലെ ഒരു മുസ്ലീം പുരോഹിതൻ, പാലെംബാംഗിൽ പരാതിയും നൽകി . അന്വേഷണങ്ങൾക്കൊടുവിൽ അടുത്തിടെയാണ് ലിനയ്ക്ക് അഞ്ച് വർഷം തടവ് ശിക്ഷ വിധിച്ചത് .
അതേസമയം തന്റെ ഭാഗത്ത് തെറ്റുണ്ടായെങ്കിൽ ക്ഷമ ചോദിക്കുന്നുവെന്ന് പറഞ്ഞ് ലിന പുതിയ വീഡിയോയും പങ്ക് വച്ചിരുന്നു.
Comments