സംസ്ഥാനത്ത് മഴ ശക്തമാകുന്നു; അടുത്ത അഞ്ച് ദിവസം ഇടിമിന്നലോട് കൂടിയ വ്യാപക മഴയ്‌ക്ക് സാധ്യത

തിരുവനന്തപുരം: സംസ്ഥാനത്തിന്റെ പലയിടങ്ങളിലും മഴ ശക്തമായി. തെക്കൻ ജില്ലകളിൽ ഇന്ന് കനത്തമഴ ലഭിച്ചു. ഇതോടെ സംസ്ഥാനത്തെ ആറ് ജില്ലകൾക്ക് യെല്ലോ അലർട്ട് പ്രഖ്യാപിച്ചു. വ്യാഴാഴ്ച അർദ്ധരാത്രിയോടെ കേരളത്തിൽ കാലവർഷമെത്തുമെന്ന് കാലാവസ്ഥാ നിരീക്ഷണ വകുപ്പ് അറിയിച്ചു.

തിരുവനന്തപുരം, കൊല്ലം,പത്തനംതിട്ട, ആലപ്പുഴ, ഇടുക്കി,എറണാകുളം ജില്ലകളിൽ ശക്തമായ മഴ തുടരുമെന്നാണ് മുന്നറിയിപ്പ്. കൂടാതെ വ്യാഴാഴ്ച ആലപ്പുഴ, എറണാകുളം ജില്ലകളിൽ യെല്ലോ അലർട്ട് പ്രഖ്യാപിച്ചു. കാലവർഷം കേരളാ തീരത്ത് എത്താൻ അനുകൂല സാഹചര്യം ഒരുങ്ങുന്നുണ്ടെന്നും കേന്ദ്ര കാലാവസ്ഥാ വകുപ്പ് അറിയിച്ചു.

അതിതീവ്രചുഴലിക്കാറ്റായി ശക്തി പ്രാപിച്ച ‘ബിപോർജോയി’യുടെ സ്വാധീനഫലമായും സംസ്ഥാനത്ത് മഴ തുടരും. സംസ്ഥാനത്ത് അടുത്ത അഞ്ച് ദിവസം ഇടിമിന്നലോട് കൂടിയ വ്യാപക മഴയ്‌ക്കും സാധ്യതയുണ്ട്. വരുംമണിക്കൂറിൽ എല്ലാ ജില്ലകളിലും ശക്തമായ കാറ്റ് വീശാൻ സാധ്യതയുണ്ടെന്നും കേന്ദ്ര കാലാവസ്ഥാ വകുപ്പ് അറിയിച്ചു. കേരള, കർണാടക തീരങ്ങളിൽ മത്സ്യബന്ധനത്തിനും വിലക്ക് ഏർപ്പെടുത്തി.