ഇനി മുതൽ ഉപയോക്താവിന് ഏത് കാർഡ് വേണമെന്ന് തിരഞ്ഞെടുക്കാം; റൂപേ, മാസ്റ്റർ, വിസ കാർഡുകൾ തമ്മിലുള്ള വ്യത്യാസമെന്ത് ?

റൂപേ കാർഡ്, മാസ്റ്റർ കാർഡ്, വിസ കാർഡ് എന്നിവ തമ്മിലുള്ള വ്യത്യാസം മനസിലാക്കുന്നത് അനുയോജ്യമായ കാർഡ് തിരഞ്ഞെടുക്കുന്നതിന് ഉപകരിക്കും. 2014 എൻപിസിഐ അവതരിപ്പിച്ച ഇന്ത്യൻ ധനകാര്യ സേവന ദാതാവാണ് റൂപേ. കമ്പനി ഇഷ്യൂ ചെയ്യുന്ന ഇന്ത്യൻ ഡെബിറ്റ് കാർഡാണ് റൂപേ കാർഡ്. വിസ അല്ലെങ്കിൽ മാസ്റ്റർകാർഡ് അമേരിക്കയിലെ രണ്ട് വൻകിട ധനകാര്യ സ്ഥാപനങ്ങളാണ്. ഇവ ഇഷ്യൂ ചെയ്യുന്ന ഡെബിറ്റ്, ക്രെഡിറ്റ്, പ്രീപെയ്ഡ് കാർഡുകളാണ് വിസ, മാസ്റ്റർകാർഡ് എന്ന പേരിൽ ഉപയോക്താക്കളിൽ എത്തുന്നത്.

പെയ്‌മെന്റ് രംഗത്തെ വിസമാസ്റ്റർകാർഡ് തുടങ്ങിയ വിദേശ ഗേറ്റ് വേകളുടെ അധിക ഇടപാട് കുറയ്‌ക്കുന്നതിനാണ് ഇന്ത്യൻ പെയ്‌മെന്റ് സിസ്റ്റത്തിൽ റൂപേ കാർഡ് അവതരിപ്പിച്ചത്. റൂപേ കാർഡിന്റെ കമ്മീഷൻ മറ്റ് കമ്പനികളെ അപേക്ഷിച്ച് കുറവാണ്. എല്ലാ ഇന്ത്യൻ ധനകാര്യ സ്ഥാപനങ്ങളിലും ബാങ്കുകളിലും ഇലക്ട്രോണിക് പെയ്‌മെന്റ് നടത്തുന്നതിന് റൂപേ സൗകര്യം ഒരുക്കുന്നു. എസ്ബിഐ ഉൾപ്പെടെ എല്ലാ പൊതുമേഖല ബാങ്കുകളും റൂപേ കാർഡുകൾ വിതരണം ചെയ്യുന്നുണ്ട്.

പ്രധാനവ്യത്യാസങ്ങൾ ഇവയൊക്കെ…

• റുപേ കാർഡ് ഒരു ഇന്ത്യൻ ഡെബിറ്റ് കാർഡാണെങ്കിൽ വിസ അല്ലെങ്കിൽ മാസ്റ്റർകാർഡ് അന്താരാഷ്‌ട്ര ഡെബിറ്റ് കാർഡാണ്.
• മറ്റൊരു വ്യത്യാസം പ്രവർത്തനച്ചെലവിലാണ്. റുപേ വഴിയുള്ള എല്ലാ ഇടപാടുകളും ഇന്ത്യയിൽ നടക്കുന്നതിനാൽ, വിസ, മാസ്റ്റർകാർഡ് എന്നിവയെ അപേക്ഷിച്ച് കുറഞ്ഞ സേവന നിരക്കുകൾ മാത്രം ബാങ്കുകൾ നൽകിയാൽ മതിയാകും.
• അന്താരാഷ്‌ട്ര ഇടപാടുകൾക്ക് റുപേ കാർഡ് ഉപയോഗിക്കാൻ ആകില്ല. വിസ അല്ലെങ്കിൽ മാസ്റ്റർകാർഡ് തന്നെ ഇതിന് ആവശ്യമുണ്ട്.
• വിസ ഡെബിറ്റ് കാർഡ് അല്ലെങ്കിൽ മാസ്റ്റർകാർഡ് ഉപയോഗിക്കുന്നതിന് ബാങ്കുകൾ ത്രൈമാസ ഫീസ് നൽകേണ്ടതുണ്ട്. എന്നാൽ റുപേ കാർഡിന് അങ്ങനെ പ്രത്യേക നിരക്ക് ഈടാക്കുന്നില്ല. അന്താരാഷ്‌ട്ര കാർഡുകൾ നൽകുന്നതിന് ബാങ്കുകൾ അവരുടെ നെറ്റ്വർക്കിന്റെ ഭാഗമാകാൻ എൻട്രി ഫീസ് നൽകണം, എന്നാൽ റുപേ കാർഡുകൾക്ക് ഇത് ബാധകമാകില്ല.
• റുപേ കാർഡ് ഡെബിറ്റ് കാർഡ് മാത്രമാണ് നൽകുന്നതെങ്കിൽ വിസ അല്ലെങ്കിൽ മാസ്റ്റർകാർഡ് ഡെബിറ്റ് കാർഡും ക്രെഡിറ്റ് കാർഡും പ്രീപെയ്ഡ് കാർഡുകളും നൽകുന്നുണ്ട്
• അന്താരാഷ്‌ട്ര കാർഡുകളുമായി താരതമ്യപ്പെടുത്തുമ്പോൾ, റുപേ കാർഡുകൾ കൂടുതൽ സുരക്ഷിതമാണ്. കാരണം അവയുടെ പ്രവർത്തനങ്ങൾ ഇന്ത്യയിൽ മാത്രം പരിമിതമാണ്. അതിനാൽ ഉപയോക്താവിന്റെ ഡാറ്റയും ഇന്ത്യയിൽ മാത്രമേ ശേഖരിക്കൂ.
• പൊതുമേഖലാ ബാങ്കുകളും തിരഞ്ഞെടുത്ത സ്വകാര്യ ബാങ്കുകളും മാത്രമല്ല ഗ്രാമീണ, സഹകരണ ബാങ്കുകളും റുപേ കാർഡ് വാഗ്ദാനം ചെയ്യുന്നുണ്ട്. എന്നാൽ വിദേശ കമ്പനികൾ ചെറുകിട ബാങ്കുകളെ നെറ്റ്വർക്കിൽ ഉൾപ്പെടുത്തുന്നില്ല.
• റുപേ കാർഡിന്റെ ഇടപാടുകൾക്ക് ചെലവ് കുറവാണെങ്കിലും വിദേശ രാജ്യങ്ങളിലെ പ്രോസസിംഗ് നടപടികൾ കാരണം വിസ അല്ലെങ്കിൽ മാസ്റ്റർകാർഡിന്റെ ഇടപാടുകൾക്കുള്ള ചെലവുകളും താരതമ്യേന കൂടുതലായിരിക്കും.