വടക്കൻ കേരളത്തിൽ മഴക്കെടുതിയിൽ പൊലിഞ്ഞത് രണ്ട് ജീവൻ; വെള്ളക്കെട്ടിൽ വീണ് കുഞ്ഞു സഹോദരങ്ങൾക്ക് ദാരുണാന്ത്യം

കോഴിക്കോട്: കോഴിക്കോട് വെള്ളക്കെട്ടിൽ വീണ് സഹോദരങ്ങൾക്ക് ദാരുണാന്ത്യം. കോഴിക്കോട് താമരശ്ശേരി കോരങ്ങാട് അബ്ദുൽ ജലീലിന്റെയും (മുട്ടായി) നാജിറയുടെയും മക്കളായ മുഹമ്മദ് ഹാദി (13) മുഹമ്മദ് ആഷിർ (7) എന്നിവരാണ് മരണപ്പെട്ടത്.

ഞായറാഴ്ച വൈകുന്നേരം മൂന്നു മണിയോടെയാണ് സംഭവം. വീടിന് സമീപത്ത് ട്യൂഷന് പോയ സഹോദരങ്ങൾ ക്ലാസിൽ എത്തിയില്ലെന്ന് ട്യുഷൻ ടീച്ചർ അറിയിക്കുകയായിരുന്നു. ഇരുവരെയും കാണ്മാനില്ല എന്ന വിവരം നാട്ടിലറിഞ്ഞതോടെ ഉടൻ തെരച്ചിൽ ആരംഭിച്ചു. ഏറെ നേരത്തെ തെരച്ചിലിന് ശേഷമാണ് വെള്ളകെട്ടിന് സമീപത്തായി കുട്ടികളുടെ ബാഗും ചെരുപ്പും കണ്ടെത്തുന്നത്. ശേഷം ഉടൻ തന്നെ വെളളക്കെട്ടിൽ നിന്നും കുട്ടികളെ പുറത്തെടുത്ത് ആശുപത്രിയിലേക്ക് കൊണ്ടുപോയി. കോഴിക്കോട് മെഡിക്കൽ കോളേജ് ആശുപത്രിയിലെത്തിച്ചെങ്കിലും ഇരുവരുടെയും ജീവൻ രക്ഷിക്കാനായില്ല. മഴ പെയ്ത് വെള്ളം നിറഞ്ഞ ആഴത്തിലുള്ള വലിയ കുഴിയിലാണ് കുട്ടികൾ വീണത്.

മുഹമ്മദ് ഹാദിയുടെയും മുഹമ്മദ് ആഷിറിന്റെയും മൃതദേഹങ്ങൾ കോരങ്ങാട് ജിഎംഎൽപി സ്‌കൂളിൽ പൊതുദർശനത്തിന് വെയ്‌ക്കും. ശേഷം ഇരുവരുടെയും ഖബറടക്കം കോരങ്ങാട് ജുമാ മസ്ജിദ് ഖബർസ്ഥാനിൽ നടക്കും. മുഹമ്മദ് ഹാദി താമരശ്ശേരി കോരങ്ങാട് ജിവിഎച്ച്എസ്എസിലെ എട്ടാം ക്ലാസ് വിദ്യാർത്ഥിയും മുഹമ്മദ് ആഷിർ കോരങ്ങാട് ജിഎംഎൽപിസ്‌കൂളിലെ രണ്ടാം ക്ലാസ് വിദ്യാർത്ഥിയുമാണ്.