നെടുമ്പാശേരിയിൽ വ്യാജ ബോംബ് ഭീഷണി; റൺവേയിലേക്ക് നീങ്ങിയ വിമാനം തിരിച്ചു വിളിച്ചു

കൊച്ചി: നെടുമ്പാശേരി വിമാനത്താവളത്തിൽ വ്യാജ ബോംബ് ഭീഷണി. വിമാനത്തിൽ ബോംബ് വെച്ചതായി അജ്ഞാത സന്ദേശം ലഭിക്കുകയായിരുന്നു. തുടർന്ന് റൺവേയിലേക്കു നീങ്ങിയ ഇൻഡിഗോ വിമാനം തിരിച്ചുവിളിച്ചു. യാത്രക്കാരെയും ലഗേജും ഇറക്കിയ ശേഷം ബോംബ് സ്‌ക്വാഡ് എത്തി പരിശോധന നടത്തി.

രാവിലെ 10.40ന് പുറപ്പെടേണ്ടിയിരുന്ന കൊച്ചി -ബെംഗളൂരു വിമാനത്തിൽ ബോംബ് വെച്ചിട്ടുണ്ടെന്നായിരുന്നു അധികൃതർക്ക് ലഭിച്ച സന്ദേശം. വിമാനം റൺവേയിലേക്കു നീങ്ങിയ ശേഷമാണ് സന്ദേശം ലഭിച്ചത്. തുടർന്ന് വിമാനത്തെ തിരികെ വിളിച്ച് പരിശോധന നടത്തി ബോംബില്ലെന്ന് സ്ഥിരീകരിക്കുകയായിരുന്നു.