ഇടുക്കി: ബാറ്ററി വെള്ളമെന്നറിയാതെ മദ്യത്തിലൊഴിച്ച് കുടിച്ചയാൾക്ക് ദാരുണാന്ത്യം. ഇടുക്കി മൂലമറ്റം സ്വദേശി മഠത്തിൽ മോഹനൻ (62) എന്നയാളാണ് മരിച്ചത്. സംഭവത്തിൽ മുരിക്കാശ്ശേരി പോലീസ് അസ്വാഭാവിക മരണത്തിന് കേസെടുത്തു.
ഇന്നലെ ഉച്ചയ്‌ക്ക് ഇടുക്കി തോപ്രാംകുടിയിലായിരുന്നു സംഭവം നടന്നത്. ജോലി ആവശ്യത്തിനായാണ് ഇയാൾ തോപ്രാംകുടിയിലെത്തിയത്. ഇന്നലെ ജോലി സ്ഥലത്ത് വച്ച് ഉച്ചഭക്ഷണം കഴിക്കുന്നതിന് മുൻപാണ് മോഹനന്‍ മദ്യം കഴിച്ചത്.
എന്നാൽ വിദേശ മദ്യം കഴിക്കുന്നതിനിടെ അബദ്ധത്തിൽ കുപ്പി മാറി ബാറ്ററി വെള്ളം മദ്യത്തിൽ മിക്സ് ചെയ്യുകയായിരുന്നുവെന്നാണ് പോലീസിന്റെ പ്രാഥമിക നിഗമനം. അവശനിലയിലായ മോഹനനെ ഇന്നലെ തന്നെ ആശുപത്രിയിൽ പ്രവേശിപ്പിച്ചു. തുടർന്ന് ചികിത്സയിലിരിക്കെയാണ് മോഹനൻ മരിച്ചത്.
Comments