അബുദാബി: മെന്റലിസ്റ്റ് കലാകാരന്‍ ഫാസില്‍ ബഷീറിന്റെ 12 ലക്ഷത്തിലേറെ വിലമതിക്കുന്ന ലഗേജ് എയര്‍ ഇന്ത്യ വിമാനത്തില്‍ നഷ്ടപ്പെട്ടതായി പരാതി.കൊച്ചിയില്‍ നിന്ന് ദുബായിലേക്കുള്ള യാത്രക്കിടയിലാണ് ലഗേജ് നഷ്ടമായത്. മെന്റലിസം,ഹിപ്നോട്ടിസം സ്റ്റേജ് ഷോയ്‌ക്ക് ആവശ്യമായ ഉപകരണങ്ങള്‍ നഷ്ടമായതിനാല്‍ യുഎഇയിലെ പരിപാടി മുടങ്ങുകയും ചെയ്തു .
ശനിയാഴ്ച കൊച്ചിയിൽ നിന്നും ദുബായിലേക്കുള്ള യാത്രയിലായിരുന്നു മെന്റലിസ്റ്റ് കലാകാരൻ ഫാസിൽ ബഷീറിന്റെ വിലപിടിപ്പുള്ള വസ്തുക്കൾ നഷ്ടമായത്. ദുബായിൽ വിമാനം ഇറങ്ങുമ്പോഴായിരുന്നു വിലപിടിപ്പുള്ള ബാഗ് നഷ്ടപ്പെട്ട വിവരം അറിയുന്നത്. കൊച്ചിയില്‍ നിന്ന് ലഗേജ് കയറ്റിവിട്ടു എന്ന് കൊച്ചിയിലെ എയര്‍ ഇന്ത്യ ഓഫീസും ദുബായില്‍ എത്തിയ വിമാനത്തില്‍ ബാഗ് ഇല്ലായിരുന്നു എന്നും ദുബായ് എയര്‍ ഇന്ത്യ ഓഫീസ് പറഞ്ഞത്. യുഎഇ സമയം 1.20ന് ലാന്‍ഡ് ചെയ്ത വിമാനത്തില്‍ നിന്ന് ഇറങ്ങി രാത്രി എട്ട് മണി വരെ എയര്‍പോര്‍ട്ടില്‍ കാത്തിരുന്നെന്നും ലഗേജ് കണ്ടെത്താന്‍ ഇതുവരെ എയര്‍ ഇന്ത്യക്ക് കഴിഞ്ഞിട്ടില്ലെന്നും ഫാസില്‍ ബഷീര്‍ പറഞ്ഞു. ഫേസ്ബുക്ക് കുറിപ്പിലൂടെ ആയിരുന്നു ഇക്കാര്യം അറിയിച്ചത്.
ഫേസ്ബുക്ക് പോസ്റ്റിന്റെ പൂർണരൂപം:
ഏറ്റവും മോശമായ അനുഭവമാണ് ഇന്ന് എയർ ഇന്ത്യയുടെ ഭാഗത്തുനിന്ന് ഉണ്ടായിരിക്കുന്നത്, ഇന്ന് രാവിലെ 11 മണിക്ക് കൊച്ചിയിൽ നിന്നും ദുബായിക്ക് വന്ന എയർ ഇന്ത്യ വിമാനത്തിൽ നിന്നും വളരെ വിലപിടിപ്പുള്ള വസ്തുക്കൾ അടങ്ങിയ എന്റെ ബാഗ് നഷ്ടപ്പെട്ടിരിക്കുന്നു ഏകദേശം 12 ലക്ഷത്തോളം രൂപ വിലവരുന്ന മെന്റലിസം ഹിപ്നോട്ടിസം സ്റ്റേജ് ഷോയ്‌ക്ക് ആവശ്യമായ വസ്തുക്കളാണ് ബാഗിനകത്ത് ഉണ്ടായിരുന്നത്, കൊച്ചിയിൽ നിന്നും ബാഗ് ഫ്ലൈറ്റിൽ കയറ്റിവിട്ടു എന്ന് കൊച്ചിയിലെ എയർ ഇന്ത്യ ഓഫീസും ദുബായിൽ വന്ന ഫ്ലൈറ്റിൽ ആ ബാഗ് ഇല്ല എന്ന് ദുബായ് എയർ ഇന്ത്യ ഓഫീസും തമ്മിൽ തമ്മിൽ പറഞ്ഞു കബളിപ്പിച്ചുകൊണ്ടിരിക്കുന്നു UAE സമയം 1: 20ന് ലാൻഡ് ചെയ്ത ഫ്ലൈറ്റിൽ നിന്നും ഇറങ്ങി രാത്രി 8 മണി വരെ എയർപോർട്ടിൽ വെയിറ്റ് ചെയ്തിട്ടും ബാഗ് ലഭിച്ചിട്ടില്ല ഇത്രയും വൃത്തികെട്ട സർവീസാണ് എയർ ഇന്ത്യ നൽകുന്നത് എന്ന് എല്ലാവരും മനസ്സിലാക്കുക. തീർച്ചയായും നിയമനടപടികളുമായി മുന്നോട്ട് പോകാൻ തീരുമാനിച്ച് എയർപോർട്ടിൽ നിന്നും പുറത്തേക്കിറങ്ങുന്നു.
Comments