ദുബൈ; പാകിസ്താനില്‍ നിന്ന് കയറ്റുമതി ചെയ്യുന്ന ഇറച്ചിയില്‍ ഫംഗസ് സന്നിദ്ധ്യം കണ്ടെത്തിയതോടെ ഇറക്കുമതി നിരോധിച്ച് യു.എ.ഇ. പ്രതി മാസം വീതമാണ് പാകിസ്താനില്‍ നിന്ന യു.എ.ഇയിലേക്ക് ഇറച്ചി കയറ്റുമതി ചെയ്യുന്നത്. നിലവില്‍ ഓക്ടോബര്‍ പത്തുവരെയാണ് നിരോധനം ഏര്‍പ്പെടുത്തിയിരിക്കുന്നത്. പ്രതി മാസം 12 മില്യണ്‍ ഡോളറിന്റെ ഇറച്ചിയാണ് പാകിസ്താനില്‍ നിന്ന് യു.എ.ഇയിലെത്തുന്നത്.
കടല്‍മാര്‍ഗം പാകിസ്താനിലെ കറാച്ചില്‍ നിന്നെത്തിയ ഇറച്ചിയിലാണ് ഫംഗസ് സാന്നിദ്ധ്യം കണ്ടെത്തിയത്. യുഎഇയിലേക്ക് ഏറ്റവും അധികം ഇറച്ചി കയറ്റുമതി ചെയ്യുന്ന രാജ്യങ്ങളിലൊന്നാണ് പാകിസ്താന്. എട്ടുവര്‍ഷത്തെ നിയന്ത്രണങ്ങള്‍ക്കൊടുവില്‍ 2017ലാണ് പാകിസ്താനില്‍ നിന്ന് ഇറച്ചി ഇറക്കുമതിക്ക് അനുമതി നല്‍കിയത്. ബഹ്‌റിന്‍, സൗദി അറബ്യേ, യു.എ.ഇ എന്നിവിടങ്ങളിലേക്കാണ് കൂടുതലായും പാകിസ്താന് ഇറച്ചി കയറ്റുമതി ചെയ്യുന്നത്. പാകിസ്താനില്‍ നിന്നുള്ള ചിക്കനും ചില പ്രശ്‌നങ്ങളുള്ളതായി നേരത്തെ കണ്ടെത്തിയിരുന്നു. തുടര്‍ന്ന് യുഎഇ ഭരണകൂടം നടപടി സ്വീകരിക്കുകയും ചെയ്തിരുന്നു.
അതേസമയം, വിമാന മാര്‍ഗം പാകിസ്താനില്‍ നിന്ന് ഇറച്ചി എത്തിക്കുന്നതിന് യു.എ.ഇ ഉപാധികളോടെ അനുമതി നല്‍കിയിട്ടുണ്ട്. യുഎഇയുടെ നടപടി പാകിസ്താന്റെ മൊത്തം കയറ്റുമതിയെ ബാധിക്കുമെന്ന് കറാച്ചിയിലെ ഓര്‍ഗാനിക് മീറ്റ് കമ്പനി ലിമിറ്റഡ് മേധാവി ഫൈസല്‍ ഹുസൈന്‍ പ്രതികരിച്ചു. വിമാന മാര്‍ഗം ഇറച്ചി കയറ്റി അയക്കുന്നതില്‍ പാകിസ്താന് ഏറെ പ്രയാസങ്ങളുണ്ട്. വളരെ ചെലവേറിയ വഴിയുമാണിത്.
