അഞ്ചാലുംമൂട് : വൃദ്ധദമ്പതികൾക്ക് അടച്ചുറപ്പുള്ള വീട് വച്ച് നൽകി ബിജെപി മെമ്പർ . പനയം വാര്‍ഡ് മെമ്പര്‍ രതീഷ് രവിയുടെ ശ്രമഫലമായി നിര്‍മിച്ച വീടിന്റെ താക്കോല്‍ ഡോ.ഇ.ചന്ദ്രശേഖരക്കുറുപ്പില്‍ നിന്ന് പനയം വാര്‍ഡില്‍ കാട്ടിച്ചേരി പാവൂര്‍ പടിഞ്ഞാറ്റതില്‍ ശിവരാമനും ചന്ദ്രമതിയും ഏറ്റുവാങ്ങി.
രതീഷ് രവി നിര്‍മിച്ചു നല്കിയ രണ്ടാമത്തെ വീടാണിത്. കഴിഞ്ഞ തദ്ദേശ സ്വയംഭരണ തെരഞ്ഞെടുപ്പ് പ്രചരണത്തിനിടയിലാണ് വൃദ്ധ ദമ്പതികളുടെ ജീവിതത്തിലെ ദുരവസ്ഥ രതീഷ് രവി കാണുന്നത്. വെള്ളം കയറിയ വീട്ടിനുള്ളില്‍ ഇഴജന്തുക്കളെ പേടിച്ച് കഴിയുന്നവര്‍ക്ക് അന്ന് നല്കിയ വാക്കാണ് വീട് നിര്‍മിച്ചു നല്‍കുമെന്നത്.സര്‍ക്കാര്‍ സഹായത്തിനായുള്ള നിരന്തരം ശ്രമം പരാജയപ്പെട്ടതോടെ, സുമനസുകളുടെ സഹായത്തോടെ വീട് വച്ചു നല്‍കാന്‍ രതീഷ് മുന്നിട്ടിറങ്ങുകയായിരുന്നു.
സമാനമായ രീതിയില്‍ വാര്‍ഡിലെ അഞ്ചു നിര്‍ധനര്‍ക്കാണ് രതീഷ് രവി വീടു നിര്‍മിച്ചു നല്കുന്നത്. ഇതിനായി സ്വപ്നം വീട് പദ്ധതി ആവിഷ്‌ക്കരിക്കുകയും ചെയ്തു.
