കാന്താരി മുളക് തഴച്ചുവളരാൻ ചെയ്യേണ്ടത്..
വീട്ടിൽ ഒന്നോ രണ്ടോ കാന്താരി തൈകൾ മാത്രമാണ് ഉള്ളതെങ്കിൽ എപ്പോഴും വെള്ളം കിട്ടുന്ന സ്ഥലത്ത് തൈ നടുക. അടുക്കളയിലെ പാത്രം കഴുകുന്ന വെള്ളമെത്തുന്ന സ്ഥലത്തോ, അലക്കുകല്ലിന്റെ അരികിലോ നടാം.. ഇത് കീടത്തിന്റെ ആക്രമണങ്ങളെ തടയാൻ സഹായിക്കും.
ദിവസവും വീട്ടിൽ മീൻ വാങ്ങാറുണ്ടെങ്കിൽ, മീൻ വൃത്തിയാക്കുന്ന വെള്ളം സിങ്കിൽ ഒഴിച്ചുകളയാതെ നേരെ കാന്താരി മുളകിന് കൊടുക്കാം. മീൻ വെള്ളം ഒഴിച്ചാൽ നല്ലപോലെ കാന്താരി മുളകുണ്ടാകും.
മഴയത്തും വെയിലത്തും കാന്താരി തൈ വിളവ് നൽകുമെങ്കിലും ഇളംവെയിൽ തട്ടുന്ന സ്ഥലത്ത് നടുന്നതാണ് കൂടുതൽ നല്ലത്. രോഗങ്ങൾ പിടിപെടാതിരിക്കാൻ ആഴ്ചയിൽ ഒരിക്കൽ വേപ്പെണ്ണ-വെളുത്തുള്ളി മിശ്രിതം തളിക്കുക. ഇത് പ്രാണികളെയും കീടങ്ങളെയും അകറ്റും. ഒപ്പം ഒരു മഞ്ഞക്കെണി കൂടി വച്ചുകൊടുക്കുക.
തൈ നടുന്നതിന് മുൻപ് നന്നായി കിളച്ച് മൺകട്ടകൾ ഉടയ്ക്കണം. മണ്ണ് നല്ലപോലെ പരുവപ്പെടുത്തിയതിന് ശേഷമേ മുളക് തൈ നടാവൂ. ചെടിച്ചട്ടയിൽ നടുകയാണെങ്കിൽ ഒരു ചട്ടിയിൽ 75-ഗ്രാം കുമ്മായം ചേർത്തുനൽകാം.
ഏപ്രിൽ-മെയ്, സെപ്റ്റംബർ-ഒക്ടോബർ മാസങ്ങൾ തൈ നടാൻ നല്ലതാണ്. ചെടി നട്ട ശേഷം പ്രതിവാരം ചാണകം, പുളിപ്പിച്ച കടലപ്പിണ്ണാക്ക്, സ്യൂഡോമൊണാസ് എന്നിവ ചേർത്ത് തളിച്ച് നൽകാം. (ഒഴിക്കരുത്)
