കൊച്ചി : ഭാരതീയ വിചാരകേന്ദ്രം ഡയറക്ടറും പ്രമുഖ ചിന്തകനുമായ പി പരമേശ്വരന്റെ നവതിയാഘോഷം ഏപ്രിൽ ഒന്ന് രണ്ട് തീയതികളിൽ നടക്കും. നവതി ആഘോഷത്തിന്റെ ഉദ്ഘാടനം നളന്ദ സർവകലാശാല വൈസ് ചാൻസലർ വിജയ് ഭട്കർ നിർവഹിക്കും. സമാപന സമ്മേളനത്തിലെ ആദരണ സഭയിൽ കേന്ദ്രമന്ത്രി രാജ്നാഥ് സിംഗ് മുഖ്യാതിഥിയാകും
ആഘോഷത്തിന്റെ ഭാഗമായി ദേശീയത: മാറുന്ന കാഴ്ചപ്പാടുകളും വെല്ലുവിളികളും , ജനസംഖ്യ , വികസനം , പരിസ്ഥിതി എന്നീ വിഷയങ്ങളിൽ സെമിനാർ നടക്കും .ഏപ്രിൽ ഒന്നിന്റെ ഉദ്ഘാടന സഭയിൽ ഡോ. വിനയ് സഹസ്രബുദ്ധെ എം പി മുഖ്യപ്രഭാഷണം നടത്തും . പൂനെ ഫെർഗൂസൻ കോളേജിലെ പ്രൊഫസർ ഡോ. പ്രസന്ന ദേശ്പാണ്ഡെ, മുൻ കേന്ദ്രമന്ത്രി ഡോ. സഞ്ജയ് പസ്വാൻ , പ്രമുഖ ചിന്തകനും ഡൽഹി സർവകലാശാല പ്രൊഫസറുമായ രാകേഷ് സിൻഹ തുടങ്ങിയവർ പങ്കെടുക്കും.
മാർക്സിൽ നിന്നും മഹർഷിയിലേക്ക്, മാർക്സും വിവേകാനന്ദനും ശ്രീനാരായണ ഗുരു നവോത്ഥാനത്തിന്റെ പ്രചാരകൻ, സ്വതന്ത്ര ഭാരതം ഗതിയും നിയതിയും, അരവിന്ദ ദർശനത്തെ പരിചയപ്പെടുത്തിയ ഭാവിയുടെ ദാർശനികൻ തുടങ്ങി വിചാരമേഖലയിൽ ചലനങ്ങൾ സൃഷ്ടിച്ച നിരവധി ഗ്രന്ഥങ്ങളുടെ രചയിതാവായ പരമേശ്വർജി രാഷ്‌ട്രീയ സ്വയംസേവക സംഘത്തിന്റെ മുതിർന്ന പ്രചാരകന്മാരിൽ ഒരാളാണ്.
