കല്‍പ്പറ്റ: വയനാട് പ്രസ്സ് ക്ലബിലേക്ക് വീണ്ടും മാവോയിസ്റ്റ് നാടുകാണി ഏരിയാ സമിതിയുടെ പത്രക്കുറിപ്പ്. തോട്ടം മേഖലയില്‍ നാമമാത്ര കൂലിവര്‍ധനവ് സംസ്ഥാന സര്‍ക്കാരിന്റെ തൊഴിലാളി വഞ്ചനയാണെന്ന് വ്യക്തമാക്കുന്നതാണ് കുറിപ്പ്.
തൊഴിലാളി പ്രതിനിധികളും തോട്ടം മേനേജുമെന്റും പങ്കെടുത്ത പിഎല്‍സി യോഗത്തില്‍ സര്‍ക്കാരിനെ പ്രതിനിധീകരിച്ച് തൊഴില്‍ മന്ത്രി പങ്കെടുത്തിട്ടും തൊഴിലാളികള്‍ക്ക് ഗുണകരമായില്ലെന്നും കുറിപ്പിലുണ്ട്.
അതേസമയം വയനാട്ടില്‍ മേപ്പാടിയില്‍ സ്വകാര്യ റിസോര്‍ട്ടിന് നേരെ മാവോയിസ്റ്റ് ആക്രമണം അഴിച്ചുവിട്ടിരുന്നു. റിസോട്ടിന്റെ ചില്ലുകള്‍ ഭീകരര്‍ കല്ലെറിഞ്ഞ് തകര്‍ത്തു. മുന്നറിയിപ്പ് നല്‍കുന്ന പോസ്റ്ററും റിസോര്‍ട്ടില്‍ പതിപ്പിച്ചിട്ടുണ്ട്.
‘ആദിവാസികള്‍ ആരുടെയും കച്ചവട വസ്തുവല്ല. ആദിവാസികളെ ടൂറിസ്റ്റുകളുടെ കാഴ്ച വസ്തുവാക്കുന്ന സര്‍ക്കാര്‍ ടൂറിസം മാഫിയക്കെതിരെ ഒന്നിക്കുക. ആദിവാസി കോളനി പരിസരത്ത് നിന്ന് മുഴുവന്‍ റിസോര്‍ട്ടുകാരെയും അടിച്ചോടിക്കുക’ എന്നിങ്ങനെയാണ് ഭീകരര്‍ പതിച്ച പോസ്റ്ററില്‍ എഴുതിയിരിക്കുന്നത്. മാവോയിസ്റ്റ് നാടുകാണി ഏരിയ കമ്മിറ്റിയുടെ പേരിലാണ് പോസ്റ്റര്‍ പതിച്ചിരിക്കുന്നത്.
