മംഗളൂരു: മംഗളൂരു വിമാനത്താവളത്തില്‍ സ്‌ഫോടക വസ്തുകള്‍ നിറച്ച ബാഗ് വെച്ച കേസില്‍ അറസ്റ്റിലായ പ്രതിയുടെ ബാങ്ക് ലോക്കറില്‍ നിന്നും സയനൈഡ് ശേഖരം കണ്ടെത്തി. ഉഡുപ്പി കര്‍ക്കള സ്വദേശി ആദിത്യ റാവുവിന്റെ ലോക്കറില്‍ നിന്നാണ് അന്വേഷണ സംഘം സയനൈഡ് കണ്ടെത്തിയത്.
കര്‍ണാടക ബാങ്കിന്റെ ഉഡുപ്പി കുഞ്ചിബെട്ടു ബ്രാഞ്ചിലെ ലോക്കറില്‍ നിന്നാണ് സയനൈഡ് കണ്ടെത്തിയത്. ഫോറന്‍സിക് പരിശോധനയില്‍ സയനൈഡ് ആണെന്ന് വ്യക്തമായിട്ടുണ്ട്. ആദിത്യ റാവുവിന് ഏതെങ്കിലും സംഘടനയുമായി ബന്ധമുണ്ടെന്ന് ഇതുവരെ കണ്ടെത്താനായിട്ടില്ല.
ജനുവരി 20 ന് രാവിലെയാണ് മംഗളൂരു വിമാനത്താവളത്തില്‍ നിന്നും സ്‌ഫോടക വസ്തുക്കള്‍ നിറച്ച ബാഗ് കണ്ടെത്തിയത്. ബാഗ് വച്ചത് താനാണെന്ന് പ്രതി സമ്മതിച്ചതായി മംഗളൂരു പോലീസ് വ്യക്തമാക്കിയിരുന്നു. സിസിടിവി ദൃശ്യങ്ങളില്‍ കണ്ടത് ഇയാളെ തന്നെയാണെന്നും പോലീസ് കണ്ടെത്തിയിരുന്നു.
