ന്യുഡല്‍ഹി: കേന്ദ്രസര്‍ക്കാറിന് നേരെ അതിര്‍ത്തിപ്രശ്‌നം ഉന്നയിച്ച രാഹുലിന്റെ ഉത്തരം മുട്ടിച്ച് ലഡാക് എം.പി. ‘ചൈന വെറുതെ നടന്നുകയറി ഇന്ത്യയുടെ അതിര്‍ത്തി കയ്യേറുകയാണ്. ഇത് അറിഞ്ഞിട്ടും പ്രധാനമന്ത്രി നിശബ്ദനാണെന്ന’ രാഹുലിന്റെ ട്വീറ്റിനായിരുന്നു ഇദ്ദേഹത്തിന്റെ ശക്തമായ മറുപടി. ബിജെപിയുടെ ലഡാക്കിലെ ലോക്‌സഭാംഗമാണ് ജാംയാങ് സെറിംഗ് നാംഗ്യാല്‍. കോണ്‍ഗ്രസ്സ് ഭരണകാലത്ത് രാജ്യത്തിന്റെ 37,244 ചതുരശ്ര കി.മീ 1962ല്‍ കയ്യേറിയത് ചൂണ്ടിക്കാട്ടിയാണ് നാംഗ്യാലിന്റെ മറുപടി. ഇനിയെങ്കിലും ഭാരതത്തിലെ ജനങ്ങളെ ഇവര്‍ വഴിതെറ്റിക്കില്ലെന്ന് വിശ്വസിക്കുന്നുവെന്നും നാംഗ്യാല്‍ പറഞ്ഞു.
ചൈനയുടെ അതിര്‍ത്തിയിലെ കടന്നുകയറ്റത്തിനെതിരെ ഇന്ത്യ ശക്തമായ സൈനിക നീക്കവുമായി മുന്നേറുന്നതിനിടെയാണ് കോണ്‍ഗ്രസ്സ് നേതാവ് രാഹുല്‍ ഗാന്ധി കേന്ദ്ര സര്‍ക്കാറിന്റെ നടപടികളെ വിമര്‍ശിച്ചത്. ചൈനപോലും ഉന്നയിക്കാത്ത വിമര്‍ശനങ്ങളുമായി രംഗത്തെത്തിയ രാഹുലിന് സ്വന്തം സര്‍ക്കാര്‍ 60 വര്‍ഷം കാണിച്ച അലംഭാവത്തെയാണ് താന്‍ ഓര്‍മ്മിപ്പിക്കുന്നതെന്നും നാംഗ്യാല്‍ പറഞ്ഞു.
സത്യാവസ്ഥ എന്താണെന്ന് എല്ലാവര്‍ക്കുമറിയാം. രാഹുല്‍ ഗാന്ധി കഴിഞ്ഞ ദിവസം പ്രതിരോധ മന്ത്രി രാജ്‌നാഥ് സിംഗിനോടാണ് ചൈന ഇന്ത്യയുടെ അതിര്‍ത്തിയില്‍ കടന്നുകയറിയോ എന്നത് വ്യക്തമാക്കണമെന്ന രീതിയില്‍ ചോദ്യം ഉന്നയിച്ചത്. ചോദ്യത്തിന് അതേ നാണയത്തില്‍ ഉത്തരം നല്‍കേണ്ടത് ലഡാക് നിവാസി കൂടിയായ തന്റെ കടമയാണെന്നാണ് നാംഗ്യാല്‍ പറഞ്ഞത്.
I hope @RahulGandhi and @INCIndia will agree with my reply based on facts and hopefully they won't try to mislead again.@BJP4India @BJP4JnK @sambitswaraj @JPNadda @blsanthosh @rajnathsingh @PTI_News pic.twitter.com/pAJx1ge2H1
— Jamyang Tsering Namgyal (@JTNBJP) June 9, 2020
‘ അതേ, ചൈന ഇന്ത്യയുടെ അതിര്‍ത്തിയില്‍ അക്‌സായ് ചിന്നില്‍ 37244 ചതുരശ്ര കി.മീ 1962ല്‍ കയ്യേറിയത് കോണ്‍ഗ്രസ്സ് ഭരിക്കുമ്പോഴാണ്. തിയാ പാംഗ്നാകിലും ചുമൂറിലെ ഛാബി താഴ്‌വരയിലെ 250 ചതുരശ്ര കി.മീറ്ററും കയ്യേറിയതും 2008ലെ കോണ്‍ഗ്രസ്സ് ഭരണത്തിലാണ് ‘ രാഹുലിന് മറുപടിയായി നാംഗ്യാല്‍ മറുപടി നല്‍കിയിരിക്കുകയാണ്.
രാഹുലിന്റെ ഉത്തരം മുട്ടിച്ചുകൊണ്ട് കോണ്‍ഗ്രസ്സ് ചൈനയ്‌ക്ക് മുന്നില്‍ മുട്ടുമടക്കിയ നിരവധി അതിര്‍ത്തി തര്‍ക്കങ്ങളുടെ തെളിവും ഇദ്ദേഹം ട്വിറ്ററിലൂടെ പുറത്ത് വിട്ടിട്ടുണ്ട്. ട്വിറ്ററിലൂടെ ചിത്രം സഹിതം വിശദമായ ഉത്തരമാണ് നാംഗ്യാല്‍ നല്‍കിയത്. ദെംജോക്കിലെ സോറാവാര്‍ട്ട് കോട്ട ചൈനയുടെ പട്ടാളം തകര്‍ത്തിട്ട് ഒന്നും ചെയ്യാന്‍ കോണ്‍ഗ്രസ്സ് സര്‍ക്കാറിനായില്ല. മാത്രമല്ല 2012ല്‍ അവരവിടെ 13 കോണ്‍ക്രിറ്റ് കെട്ടിടങ്ങള്‍ നിരീക്ഷണ കേന്ദ്രമാക്കി പണിതതും കോണ്‍ഗ്രസ് ഭരണകാലത്താണെന്നും രാഹുലിന് മറുപടിയായി നാംഗ്യാല്‍ പറഞ്ഞു. തന്റെ വിശദീകരണം രാഹുലും കോണ്‍ഗ്രസും മനസിലാക്കുമെന്നാണ് കരുതുന്നതെന്നും, ഇനിയെങ്കിലും ഇന്ത്യക്കാരെ വഴിതെറ്റിക്കാന്‍ ശ്രമിക്കില്ലെന്നുമാണ് വിശ്വാസമെന്നും നാംഗ്യാല്‍ ട്വിറ്ററില്‍ കുറിച്ചു.
