മുസാഫര്‍ബാദ്: പാക് അധിനിവേശ കശ്മീരിര്‍ ചൈനയുടെ കുതന്ത്രങ്ങള്‍ക്കെതിരെ പ്രതിഷേധ പ്രകടനങ്ങള്‍ നടക്കുന്നതായാണ് റിപ്പോര്‍ട്ട്. പാകിസ്താനില്‍ പണിയുന്ന രണ്ട് അനധികൃത ഡാമുകള്‍ക്കെതിരെയാണ് പ്രക്ഷോഭം ശക്തമാകുന്നത്. പാക് അധീന കശ്മീര്‍ മേഖലയിലെ നീലം, ഝലം നദികളിലാണ് ചൈനയുടെ സഹായത്താല്‍ ഡാമുകള്‍ പണിയുന്നത്. പ്രദേശത്തെ വന്‍ ജനാവലിയാണ് ഡാമുകളുടെ നിര്‍മ്മാണത്തിനെതിരെ രംഗത്തു വന്നിരിക്കുന്നത്. ഇതോടൊപ്പം വൈദ്യുതി നിലയത്തിനായി പണിയുന്ന കൊഹ്ലാ പദ്ധതിക്കെതിരേയും ജനരോഷമുയരുകയാണ്.
1124 മെഗാവാട്ട് വൈദ്യുതി ഉല്പാദിപ്പിക്കുന്ന പദ്ധതി എന്ന പേരിലാണ് പാക് അധീന കശ്മീരില്‍ പാകിസ്താനുമായി ചൈന കരാര്‍ ഒപ്പിട്ടത്.1000 കോടിരൂപയുടെ പദ്ധതിക്കാണ് ധാരണ. ചൈനയുടെ സാമ്പത്തിക ഇടനാഴി പദ്ധതി പ്രകാരമാണ് ഡാം നിര്‍മ്മിക്കുന്നത് അതിനായി ത്രീ ഗോര്‍ജസ് കോര്‍പ്പറേഷന്‍ എന്ന ഒരു ഉപസ്ഥാപനവും ചൈന പാകിസ്താനില്‍ രൂപീകരിച്ചിരിക്കുകയാണ്. പ്രദേശത്തെ പാരിസ്ഥിതിക സന്തുലനം തകര്‍ക്കാനുള്ള പുറപ്പാടിലാണ് ചൈനയെ കൂട്ടുപിടിച്ച് ഇമ്രാന്‍ ഭരണകൂടമെന്ന് പ്രതിഷേധക്കാര്‍ ആരോപിക്കുകയാണ്.
അതിര്‍ത്തിയില്‍ അനധികൃത ഡാമുകള്‍ പണിത് ജലബോംബ് സംവിധാനം ഒരുക്കുന്ന ചൈനയുടെ കുതന്ത്രമാണെന്നും പ്രതിഷേധിക്കുന്നവരില്‍ ഒരു വിഭാഗം ചൂണ്ടിക്കാട്ടി. ഇത് ഐക്യരാഷ്‌ട്ര രക്ഷാ സമിതിയുടെ ഡാമുകള്‍ പണിയുന്നതുമായി ബന്ധപ്പെട്ട അന്താരാഷ്‌ട്ര നിയമങ്ങളുടെ ലംഘനമാണെന്നും കശ്മീര്‍ ജനത ചൂണ്ടിക്കാട്ടുന്നു. തര്‍ക്കപ്രദേശത്ത് ഡാം പണിയാന്‍ ഏതു നിയമപ്രകാരമാണ് പാകിസ്താനും ചൈനയും ധാരണ ഒപ്പിട്ടതെന്ന് വ്യക്തമാക്കണമെന്ന് പ്രതിഷേധക്കാര്‍ ചോദിച്ചു. നിലവില്‍ പാകിസ്താന് എല്ലാവിധ സാമ്പത്തിക-സൈനിക പിന്തുണയും നല്‍കുന്ന ചൈനക്കെതിരെ സ്വന്തം ജനങ്ങള്‍ തിരിയുന്നതിന്റെ ആശങ്കയിലാണ് ഇമ്രാന്‍ ഭരണകൂടം. ചൈന പാകിസ്താനെ സാമ്പത്തിക അടിമയാക്കിയിരിക്കുകയാണെന്ന അമേരിക്കന്‍ വിദേശകാര്യവകുപ്പിന്റെ റിപ്പോര്‍ട്ടുകള്‍ക്ക് പിറകേയാണ് പാക്അധീന കശ്മീരില്‍ പാക് വിരുദ്ധവികാരം ആളിപ്പടരുന്നത്.
