പശ്ചിമബംഗാള്‍: സംസ്ഥാനത്തെ കൊറോണ പ്രതിരോധ പ്രവര്‍ത്തനം മുഴുവന്‍ താളം തെറ്റിച്ച മമതാ ബാനര്‍ജിക്കെതിരെ രൂക്ഷ വിമര്‍ശനവുമായി ബി.ജെ.പി സംസ്ഥാന ഘടകം രംഗത്ത്. കൊറോണ പ്രതിരോധ പ്രവര്‍ത്തനത്തിന് യാതൊരു ഗൗരവവും കൊടുക്കാതിരുന്ന മുഖ്യമന്ത്രി മമത എന്നാല്‍ കേന്ദ്ര സര്‍ക്കാറിനെതിരെ പടവെട്ടുന്ന തിരക്കിലാണെന്നാണ് ബി.ജെ.പിയുടെ ആരോപണം. ബി.ജെ.പി സംസ്ഥാന അധ്യക്ഷന്‍ ദിലീപ് ഘോഷാണ് വിമര്‍ശനവുമായി രംഗത്തെത്തിയത്.
‘സംസ്ഥാനം നിരവധി പ്രതിസന്ധികളിലൂടെ കടന്നുപോവുകയാണ്. കൊറോണ എല്ലായിട ത്തും വ്യാപിച്ചിരിക്കുന്നു. ഉംപൂണ്‍ ചുഴലിക്കാറ്റിന്റെ ദുരന്തത്തില്‍ നിന്നും പല പ്രദേശങ്ങളും മുക്തമായിട്ടില്ല. ജനങ്ങളെല്ലാം കഷ്ടപ്പാടിലാണ്. ഈ പ്രശ്‌നങ്ങള്‍ക്കെതിരെ പോരാടേണ്ട തിനിടയില്‍ കേന്ദ്രസര്‍ക്കാറിനെതിരെ യുദ്ധം ചെയ്യുന്നതിലാണ് മമതയുടെ ശ്രദ്ധ’ ദിലീപ് ഘോഷ് പറഞ്ഞു.
‘സംസ്ഥാനത്തെ പോലീസ് ബി.ജെ.പി പ്രവര്‍ത്തകരുടെ പുറകേ പായുകയാണ്. മമതയുടെ ഗുണ്ടകള്‍ ബി.ജെ.പി പ്രവര്‍ത്തകരെ കൊന്നൊടുക്കുകയാണെന്നും ഘോഷ് ആരോപിച്ചു. ഒരു എം.എല്‍.എ പോലും സുരക്ഷിതനല്ല. മമതാ ബാനര്‍ജി മുഖ്യമന്ത്രി എന്ന നിലയില്‍ തീര്‍ത്തും പരാജയമാണെന്നും ഘോഷ് വിമര്‍ശിച്ചു.
നിരന്തരം കേന്ദ്രസര്‍ക്കാറിന്റെ നയങ്ങളെ വിമര്‍ശിക്കുന്ന മമത സംസ്ഥാന ഗവര്‍ണര്‍ ക്കെതിരെ എന്നും യുദ്ധത്തിലാണെന്നും ബി.ജെ.പി അധ്യക്ഷന്‍ കുറ്റപ്പെടുത്തി. ഗവര്‍ണര്‍ അധ്യക്ഷനായ സര്‍വകലാശാല വൈസ്ചാന്‍സലര്‍മാരുടെ യോഗം പോലും മമത അലങ്കോലമാക്കിയെന്നും ഘോഷ് ചൂണ്ടിക്കാട്ടി.
