ഗോവയെന്നാൽ ബീച്ചുകളും പബ്ബുകളും മാത്രമല്ല. നിരവധി ദേവാലയങ്ങളുടെ ഭൂമി കൂടിയാണ്. ഗോവ യാത്രയിൽ ഒഴിവാക്കാൻ പാടില്ലാത്ത ഒരു ക്ഷേത്രമുണ്ട്, താംബ്ഡി സുർള മഹാശിവക്ഷേത്രം. കഴിഞ്ഞ കാലത്തിന്റെ ബാക്കിപത്രമായി കാടിനുള്ളിൽ വെള്ളച്ചാട്ടത്തിന് സമീപമായാണ് നിങ്ങൾക്ക് ഈ ക്ഷേത്രത്തെ കണ്ടെത്താൻ സാധിക്കുക. വിശ്വാസികൾക്ക് പുറമെ സാഹസിക സഞ്ചാരികളെയും ആകർഷിക്കുന്ന ഈ ക്ഷേത്രം ഗോവയുടെ മറ്റൊരു മുഖമാണ് കാണിച്ചു തരുന്നത്.
ഭഗവാൻ മഹാവീർ വൈൽഡ് ലൈഫ് സാങ്ച്വറിയിലാണ് പുരാതനമായ ഈ ക്ഷേത്രം കാണാൻ സാധിക്കുന്നത്. ഇന്ത്യയിലെ ശൈവവിശ്വാസികളുടെ പ്രധാന ക്ഷേത്രങ്ങളിൽ ഒന്നാണ് ഇത്. ഭാരതത്തിന്റെ സംസ്കാരത്തിലെ തന്നെ എടുത്ത് പറയേണ്ട ഒന്നായ ഈ ക്ഷേത്രം കാദംബ ഭരണകാലത്താണ് നിർമ്മിച്ചത്. മുസ്ലിം ഭരണാധികാരികളുടെയും ഇംഗ്ലീഷ് ആധിപത്യത്തിന്റെയും തേരോട്ടത്തിന് ശേഷം തകർക്കപ്പെടാത്ത ഏക കാദംബ ക്ഷേത്രമെന്ന പ്രത്യേകതയുമുള്ള ഈ ക്ഷേത്രം ഡെക്കാൻ പ്ലേറ്റുകളിൽ നിന്ന് കൊണ്ട് വന്ന ബസാൾട്ട് കല്ലുകൾ ഉപയോഗിച്ചാണ് നിർമ്മിച്ചിരിക്കുന്നത്.
12-)o നൂറ്റാണ്ടിൽ യാദവ രാജാവായിരുന്ന രാമചന്ദ്രയുടെ മന്ത്രിമാരിൽ ഒരാളാണ് ഈ ക്ഷേത്രനിർമ്മാണം നടത്തിയത്. ജൈന മതക്കാരുടെ രീതികൾക്ക് അനുസരിച്ച് നിർമ്മിച്ചിരിക്കുന്ന ഈ ക്ഷേത്രത്തിൽ ശിവൻ ആണ് പ്രതിഷ്ഠ. ശ്രീകോവിലിനുള്ളിൽ ശിവലിംഗത്തിന് സമീപം വലിയൊരു സർപ്പം കാവൽ നിൽക്കുന്നുണ്ടെന്നാണ് വിശ്വാസം. ക്ഷേത്രചുവരുകളിലും തൂണുകളിലും നിരവധി കൊത്തുപണികളും ചിത്രപണികളും കാണാൻ സാധിക്കും. അധിനിവേശ കാലത്ത് ക്ഷേത്രങ്ങൾ നശിപ്പിക്കപ്പെട്ടതിന്റെ ബാക്കിയാണ് ശിവ വാഹനമായ നന്ദിയുടെ തലയില്ലാതെ രൂപം.
ക്ഷേത്രത്തിന് സമീപം കാണുന്ന വെള്ളച്ചാട്ടമാണ് മറ്റൊരു ആകർഷണം. പ്രകൃതി സൗന്ദര്യം നിറഞ്ഞുതുളുമ്പുന്ന ഈ വെള്ളച്ചാട്ടം കാണാൻ ആളുകൾ നിരവധിയാണ് ഇവിടെ എത്താറുള്ളത്.
കാടിനുള്ളിൽ ഈ ക്ഷേത്രത്തിലേക്ക് വിശ്വാസികളും സഞ്ചാരികളുമടക്കം നിരവധി ആളുകളാണ് ഓരോ വർഷവും വരുന്നത്. ഗോവയുടെ ഉന്മാദങ്ങളിൽ നിന്ന് ചെറിയൊരു ഒളിച്ചോട്ടം ആണ് ഈ സ്ഥലങ്ങളിലേക്കുള്ള യാത്രകൾ.
Comments