ദേവനഹള്ളി കോട്ടയുടെ ചരിത്രം

ടിപ്പു സുൽത്താനെ അറിയാത്തവരായി ആരും തന്നെയില്ല. എന്നാൽ ടിപ്പു സുൽത്താൻ ജനിച്ച ദേവനഹള്ളി കോട്ടയെ അറിയുന്നവർ ചുരുക്കം ആയിരിക്കും. ബാംഗ്ലൂർ നഗരത്തിലെ ചരിത്രസ്മാരകങ്ങൾക്കിടയിൽ പലരും മറന്നുപോവുന്ന ഒരിടമാണ് ഇത്. ബാംഗ്ലൂർ സന്ദർശിക്കുന്നവർക്ക് ബാംഗ്ലൂർ പാലസും നന്ദി ഹിൽസും ടിപ്പു സുൽത്താൻ സമ്മർ പാലസും ഒക്കെ സുപരിചിതമാണെങ്കിലും ദേവനഹള്ളി കോട്ട അപരിചിതമായിരിക്കും.

ബാംഗ്ലൂരിൽ നിന്നും 40 കിലോമീറ്ററോളം അകലെ എയർപോർട്ട് റോഡിലൂടെ സഞ്ചരിച്ച് നമുക്ക് ദേവനഹള്ളി കോട്ടയിൽ എത്താം. വളരെ കുറച്ചാളുകൾ മാത്രമാണ് ഇവിടെ എത്താറുള്ളത്. ടിപ്പു സുൽത്താന്റെ ജന്മസ്ഥലം തന്നെയാണോ ഇതെന്ന സംശയവും എല്ലാവർക്കും ഉണ്ടാവാറുണ്ട്.

20 ഏക്കർ സ്ഥലത്താണ് കോട്ട സ്ഥിതിചെയ്യുന്നത്. 1501ൽ ആവധിയിലെ മല്ലു ബൈരേ ഗൗഡയാണ് തന്റെ സമുദായത്തിലെ അംഗങ്ങളെ താമസിപ്പിക്കുന്നതിനായി ഇത്തരത്തിലൊരു കോട്ട നിർമ്മിക്കുന്നത്. പതിനെട്ടാം നൂറ്റാണ്ട് വരെ ഇവരുടെ അധീനതയിൽ ആയിരുന്നുവെങ്കിലും 1791ൽ മൈസൂർ ദളവയായിരുന്ന നൻജരാജിയ കീഴടക്കി. പിന്നീട് പിന്തുടർച്ചവകാശപ്രകാരം ടിപ്പുവിന്റെ പിതാവ് ഹൈദരലിയിലേക്ക് കൈമാറ്റം ചെയ്യപ്പെട്ടു. പിന്നീട് ടിപ്പു ജനിക്കുകയും ബ്രിട്ടീഷുകാർ ഈ സ്ഥലം സ്വന്തമാക്കുകയും ചെയ്തു.

ടിപ്പു സുൽത്താന്റെ കൊട്ടാരമാണോ ഇവിടെ ഇപ്പോൾ ഉള്ളത് എന്ന ചോദ്യത്തിന് ഇല്ലായെന്നാണ് ഉത്തരം. ടിപ്പുവിന്റെ ജന്മസ്ഥലം എന്നും വർഷവും എഴുതിവെച്ചിരിക്കുന്ന ഒരു ബോർഡ് മാത്രമാണ് അവിടെ ഉള്ളത്. ആർക്കിയോളജിക്കൽ സർവ്വേ ഓഫ് ഇന്ത്യയാണ് ഇപ്പോൾ ഈ പ്രദേശം സംരക്ഷിക്കുന്നത്.

വിവിധ രാജപരമ്പരകളുടെ കയ്യിൽ വന്നുപെട്ട ഈ കോട്ടയിൽ വ്യത്യസ്തമാർന്ന നിരവധി നിർമ്മാണങ്ങളും നിങ്ങൾക്ക് കാണാം

കോട്ടയ്‌ക്ക് സമീപം ഒരു ഗ്രാമം ഉണ്ട്. ജനങ്ങൾ താമസിക്കുന്ന ഈ ഗ്രാമത്തിൽ നിന്നും കോട്ടയിലേക്ക് കുറച്ച് ദൂരമുണ്ടെങ്കിലും സാങ്കേതികമായി ഇവരും കോട്ടയ്‌ക്കുള്ളിൽ തന്നെയാണ്.