സൗന്ദര്യം എന്ന സങ്കല്പത്തിൽ പ്രധാന പങ്ക് വഹിക്കുന്ന ഒന്നാണ് ആരോഗ്യമുള്ള മുടി . ഇക്കാലത്ത്, മുടി കൊഴിച്ചിൽ എന്നത് നിരവധി ആളുകൾ നേരിടുന്ന ഒരു പ്രധാന പ്രശ്നമാണ് . പ്രധാനമായും നമ്മൾ പിന്തുടരുന്ന ജീവിതശൈലിയാണ് ഇതിന് കാരണം. മലിനീകരണം, പൊടി, അനുചിതമായ ഭക്ഷണക്രമം, രാസ ഉൽ‌പന്നങ്ങളുടെ ഉപയോഗം തുടങ്ങിയവ മുടിയെ വരണ്ടതാക്കുന്നു. മുടിയിൽ അമിതമായി സൂര്യപ്രകാശം തട്ടിയാലും അവ നിങ്ങളുടെ മുടി വരണ്ടതും ദുർബലവുമാക്കുന്നു.
മുടി കൊഴിച്ചിൽ നിർത്താനുള്ള പരിഹാര മാർഗ്ഗം തേടി ഓടുന്നതിനിടയിൽ , നമ്മുടെ ആഹാരക്രമം ഒന്ന് പരിഷ്കരിച്ചു കൊണ്ട് പോഷകങ്ങൾ ധാരാളം അടങ്ങിയിട്ടുള്ള ഭക്ഷണ പദാർത്ഥങ്ങൾ ആഹാരക്രമത്തിൽ ഉൾപ്പെടുത്തുന്നത് മുടി കൊഴിച്ചിൽ കുറക്കാനും മുടിയുടെ ആരോഗ്യം വർദ്ധിപ്പിക്കാനും സഹായിക്കും .
വിറ്റാമിൻ എ, സി, ഡി, ഇ, പ്രോട്ടീൻ, സിങ്ക്, ഇരുമ്പ് തുടങ്ങിയ പോഷകങ്ങൾ മുടിക്ക് ആരോഗ്യകരവും മുടിക്ക് കട്ടിയും , തിളക്കവും , മുടി തഴച്ചു വളരുന്നതിന് സഹായിക്കുകയും ചെയ്യും . മുടിക്ക് അഴകും തിളക്കവും വളർച്ചയും പ്രധാനം ചെയ്യാൻ കഴിവുള്ള പോഷകങ്ങൾ നിറഞ്ഞ ചില ഭക്ഷ്യ വസ്തുക്കൾ ഇവയൊക്കെയാണ്
മുട്ട : മുടിയുടെ വളർച്ചയ്‌ക്ക് ഗുണം ചെയ്യുന്ന പ്രോട്ടീന്റെ സമൃദ്ധമായ ഉറവിടമാണ് മുട്ട. അതിനാൽ പ്രോട്ടീൻ അടങ്ങിയ മുട്ട കഴിക്കുന്നത് മുടി കൊഴിച്ചിൽ തടയുകയും മുടിയുടെ അളവും വളർച്ചയും കൂട്ടുകയും ചെയ്യുന്നു.
ചീര- ഇലക്കറിയായ ചീരയിൽ ധാരാളം ഇരുമ്പ്, വിറ്റാമിൻ എ, സി തുടങ്ങിയ പോഷകങ്ങൾ അടങ്ങിയിരിക്കുന്നതിനാൽ മുടിയുടെ കരുത്തു നിലനിർത്താൻ സഹായിക്കുകയും കൂടാതെ ഇരുമ്പു സത്ത് തലയോട്ടിയിൽ രക്തയോട്ടം വർദ്ധിപ്പിക്കുകയും തന്മൂലം മുടി നന്നായി വളരാൻ സഹായിക്കുകയും ചെയ്യുന്നു .
കാരറ്റ്- തലയോട്ടിക്ക് പോഷണം നൽകുന്ന വിറ്റാമിൻ എ ധാരാളം അടങ്ങിയിട്ടുള്ളതിനാൽ മുടിക്ക് ശക്തി നൽകുകയും മുടി കൊഴിച്ചിൽ തടയുകയും ചെയ്യുന്നു.
നാരങ്ങ, ഓറഞ്ച് തുടങ്ങിയ സിട്രിക് പഴങ്ങൾ വിറ്റാമിൻ സിയുടെ സമൃദ്ധമായ ഉറവിടമാണ്. ഒരു വ്യക്തിയുടെ പ്രതിരോധശേഷി വർദ്ധിപ്പിക്കുന്നതിനും മുടിയുടെ വളർച്ചയെ സഹായിക്കാനും ഈ ഭഷ്യ വസ്തുക്കൾക്ക് സാധിക്കും .
തൈര്- വിറ്റാമിൻ ഡി, വിറ്റാമിൻ ബി 5 എന്നിവ അടങ്ങിയിരിക്കുന്നതിനാൽ തൈര് കഴിക്കുന്നത് മുടിക്ക് ആരോഗ്യകരമാണ്.
കരുത്തും , തിളക്കവും , ഇടതൂർന്നതുമായ മുടിക്ക് ആരോഗ്യപ്രദമായ ഭക്ഷണക്രമം അത്യാവശ്യമാണ് . അതിനാൽ ആഹാരക്രമത്തിൽ മുടിക്ക് ആവശ്യമുള്ള പോഷകങ്ങൾ നിറഞ്ഞ ഭക്ഷണം ഉൾപെടുത്തേണ്ടത് അനിവാര്യമാണ് .
Comments