സ്പാനിഷ് ലീഗില്‍ ബാഴ്‌സയ്‌ക്കും റയലിനും ജയം; മെസ്സിക്കൊപ്പും ഫാത്തി; റാമോസും തിളങ്ങി

ബാഴ്‌സലോണ: മെസ്സിയുടെ മികവില്‍ ബാഴ്‌സലോണയ്‌ക്കും റാമോസിന്റെ മികവില്‍ ബെറ്റിസിനെതിരെ നിലവിലെ ചാമ്പ്യന്മാരായ റയല്‍ മാഡ്രിഡിനും സ്പാനിഷ് ലീഗില്‍ ജയം.

മെസ്സിയുടേയും ഫാത്തിയുടേയും മികവില്‍ ബാഴ്‌സലോണ ഏകപക്ഷീയമായ നാലു ഗോളുകള്‍ക്കാണ് വില്ലാറയലിനെതിരെ ജയം നേടിയത്. ആന്‍സു ഫാത്തിയുടെ ഇരട്ടഗോള്‍ മികവാണ് മെസ്സിക്കൊപ്പം ബാഴ്‌സ തകര്‍പ്പന്‍ ജയം സ്വന്തമാക്കിയത്. 15,19 മിനിറ്റുകളിലാണ് ഫാത്തി വില്ലാറയലിന്റെ ഗോള്‍വല കുലുക്കിയത്. 35-ാം മിനിറ്റില്‍ പെനാല്‍റ്റി വലയിലെത്തിച്ച് ലയണല്‍ മെസ്സി ഗോള്‍ നേടിയപ്പോള്‍ ബാഴ്‌സയ്‌ക്കായി നാലാം ഗോള്‍ വില്ലാറയലിന്റെ പൗ ടോറസിന്റെ സെല്‍ഫ് ഗോളിലൂടെ സമ്മാനിക്കുകയായിരുന്നു.

രണ്ടാം മത്സരത്തില്‍ ചാമ്പ്യന്മാരായ റയല്‍ മാഡ്രിഡ് രണ്ടിനെതിരെ മൂന്ന് ഗോളുകള്‍ക്കു റയല്‍ ബെറ്റിസിനെ തോല്‍പ്പിച്ചു. 14-ാം മിനിറ്റില്‍ വാല്‍വാര്‍ദേയിലൂടെയാണ് റയല്‍ മുന്നിലെത്തിയത്. എന്നാല്‍ 35-ാം മിനിറ്റിലും 37-ാം മിനിറ്റിലും ഗോളുകള്‍ നേടി ബെറ്റിസ് 2-1ന്റെ ലീഡ് നേടി. രണ്ടാം പകുതിയുടെ തുടക്കത്തില്‍ എമഴ്‌സണിന്റെ സെല്‍ഫ് ഗോള്‍ ബെറ്റിസിന് വിനയായി ഗോള്‍ 2-2 സമനിലയിലെത്തി. 82-ാം മിനിറ്റില്‍ സെര്‍ജിയോ റാമോസിലൂടെ റയ്ല്‍ മാഡ്രിഡ് 3-2ന് ജയം സ്വന്തമാക്കി. 67-ാം മിനിറ്റില്‍ എമഴ്‌സണ്‍ ചുവപ്പുകാര്‍ഡ് കണ്ട് പുറത്തായതും ബെറ്റിസിന് ക്ഷീണമായി.