റോമ: യൂറോപ്പാ ലീഗിലെ ഗ്രൂപ്പ് പോരാട്ടങ്ങളില്‍ മുന്‍നിര ടീമുകള്‍ക്ക് ജയവും തോല്‍വിയും . എട്ടു ഗ്രൂപ്പുകളുടെ ആദ്യ മത്സരത്തില്‍ എസി.റോമയും റേയ്‌ഞ്ചേഴ്‌സും ജയം നേടി. ആദ്യ മത്സരത്തില്‍ ശക്തരായ നാപ്പോളിയ്ക്ക് അടിതെറ്റി.
എ.സി. റോമ ഒന്നിനെതിരെ രണ്ടു ഗോളിനാണ് യങ് ബോയ്‌സ് ക്ലബ്ബിനെ തോല്‍പ്പിച്ചത്. 14-ാം മിനിറ്റില്‍ പെനാല്‍റ്റി മുകലാക്കി യങ്‌ബോയ്‌സ് റോമയെ ഞെട്ടിച്ച് ആദ്യ ഗോള്‍ നേടി. എന്നാല്‍ രണ്ടാം പകുതിയിലെ രണ്ടു ഗോളുകളിലൂടെ റോമ ജയം സ്വന്തമാക്കി. 69-ാം മിനിറ്റില്‍ ഡാ സില്‍വ പരേസാണ് സമനില ഗോള്‍ നേടിയത്. സീക്കോയുടെ പാസ്സാണ് പരേസ് ഗോളാക്കിയത്. 73-ാം മിനിറ്റില്‍ കുംബുള്ളയാണ് വിജയഗോള്‍ നേടിയത്. മിതാരിയാന്‍ നല്‍കിയ പാസ്സിലൂടെയാണ് കുംബുള്ള ഗോളടിച്ചത്.
റേഞ്ചേഴ്‌സിന്റെ ജയം എതിരില്ലാത്ത രണ്ടു ഗോളുകള്‍ക്കായിരുന്നു. സ്റ്റാന്‍ഡാര്‍ഡ് ലേഗയെയാണ് തോല്‍പ്പിച്ചത്. കളിയുടെ 19-ാം മിനിറ്റില്‍ ലഭിച്ച പെനാല്‍റ്റിയാണ് തവെര്‍നീര്‍ ഗോളാക്കിയത്. കളിയുടെ അവസാന നിമിഷത്തെ അധിക സമയത്ത് റൂഫേ രണ്ടാം ഗോളും നേടി ജയം ആധികാരികമാക്കി.
ആദ്യമത്സരത്തില്‍ നാപ്പോളിയ്ക്ക് അടിതെറ്റിയ കാഴ്ചയും ആരാധകര്‍ ഇന്നലെ കാണേണ്ടിവന്നു. ഏകപക്ഷീയമായ ഒറ്റ ഗോളിനാണ് അല്‍കമാര്‍ നാപ്പോളിയെ വീഴ്‌ത്തിയത്. 57-ാം മിനിറ്റില്‍ ഡീ വിറ്റാണ് ഗോള്‍ നേടിയത്. വെന്‍സണ്‍ നല്‍കിയ പന്താണ് ഡീ വിറ്റ് വലയിലെത്തിച്ചത്. ആകെ 12 മത്സരങ്ങളാണ് ഇന്നലെ നടന്നത്.
Comments