വാഷിംഗ്ടണ്‍: ജോ ബൈഡന്റെ വിദേശകാര്യ നയങ്ങളില്‍ റഷ്യാ-ചൈനാ ബന്ധം തകര്‍ക്കല്‍ പ്രധാന അജണ്ടയെന്ന് സൂചന. അറുപതു വര്‍ഷമായി റഷ്യയും ചൈനയും തമ്മിലുള്ള പ്രധാനകരാറുകളെല്ലാം അന്താരാഷ്‌ട്ര ഉടമ്പടികള്‍ക്ക് വിരുദ്ധമാണെന്ന നിലാപാടാണ് ബൈഡനും ഡെമോക്രാറ്റുകള്‍ക്കുമുള്ളത്. അന്റാര്‍ട്ടിക്കയിലെ ഗവേഷണ കേന്ദ്രങ്ങളുമായി ബന്ധപ്പെട്ട് റഷ്യയും ചൈനയും കരാറുകള്‍ ലംഘിക്കുകയാണ്. ആണവ സംബന്ധമായ യാതൊരു ഗവേഷണവും അന്റാര്‍ട്ടിക്കയില്‍ നടത്തരുതെന്ന നിബന്ധന ഇരുരാജ്യങ്ങളും ലംഘിച്ചുവെന്നാണ് ഡെമോക്രാറ്റുകള്‍ ആരോപിക്കുന്നത്.
കൊറോണയ്‌ക്ക് മുന്നേ തന്നെ ചൈനയ്‌ക്കെതിരെ അമേരിക്ക എടുത്ത എല്ലാ നടപടിക്കും റഷ്യ ചൈനയ്‌ക്ക് താങ്ങായെന്ന് വൈറ്റ്ഹൗസ് വൃത്തങ്ങള്‍ പറയുന്നു. വ്‌ലാദിമിര്‍ പുടിന്റെ പരസ്യമായ അമേരിക്കന്‍ വിരുദ്ധനയം ചൈനയ്‌ക്ക് ഗുണമാകുന്നതായാണ് ബൈഡന്‍ അനുകൂലികളും ആരോപിക്കുന്നത്.
സമീപകാലത്ത് ചൈനയുമായി പ്രതിരോധ സൈനിക കരാറുകള്‍ക്കും പുടിന്‍ ഒരുങ്ങുന്നുവെന്ന വാര്‍ത്തയും അമേരിക്കന്‍ സ്റ്റേറ്റ് ഡിപ്പാര്‍ട്ട്‌മെന്റ് ഗൗരവത്തോടെയാണ് കാണുന്നത്. ഭരണമാറ്റം അമേരിക്കയുടെ പ്രതിരോധ നയം കൂടുതല്‍ ശക്തമാക്കുന്നുവെന്ന സൂചനയാണ് ചൈന-റഷ്യ ബന്ധത്തെ എതിര്‍ക്കുന്നതിലൂടെ പുറത്തുവരുന്നത്.
Comments