ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ നിലവിലെ ചാന്പ്യന്മാര്‍ക്ക് തകര്‍പ്പന്‍ ജയം. മറ്റൊരു മത്സരത്തില്‍ ആഴ്‌സണലിന് സമനില കൊണ്ട് തൃപ്തിപ്പെടേണ്ടിവന്നു. ലിവര്‍പൂള്‍ കരുത്തരാരായ ലെസ്റ്റര്‍ സിറ്റിയെ എതിരില്ലാത്ത മൂന്ന് ഗോളുകള്‍ക്ക് തകര്‍ത്തപ്പോള്‍ ആഴ്‌സണലിനെ ദുര്‍ബലരായ ലീഡ്‌സ് യുണൈറ്റഡ് ഗോള്‍ രഹിത സമനിലയിലും കുരുക്കി.
ലിവര്‍പൂള്‍ ഇരുപകുതികളിലുമായാണ് ഗോള്‍ നേടിയത്. 21-ാം മിനിറ്റില്‍ ലെസ്റ്ററിന്റെ പിഴവാണ് ലിവര്‍പൂളിന് ഗുണമായത്. ജോണീ ഇവാന്‍സിന്റെ കാലില്‍ തട്ടിയ പന്ത് അവരുടെ വലയില്‍ത്തന്നെ കുരുങ്ങിയതോടെയാണ് 1-0ന് ചെമ്പട ലീഡ് നേടിയത്. 41-ാം മിനിറ്റില്‍ ലിവര്‍പൂളിനായി ഡിയോഗോ ജോട്ട രണ്ടാം ഗോളും റോബര്‍ട്ടോ ഫിര്‍മിനോ 86-ാം മിനിറ്റില്‍ മൂന്നാം ഗോളും നേടി.
ആഴ്‌സണലിനെ ഒരു വിധത്തിലും ഗോളടിക്കാനനുവദിക്കാതെയാണ് ലീഡ്‌സിന്റെ പ്രതിരോധ നിര തിളങ്ങിയത്. ലീഡ്‌സിന്റെ പ്രതിരോധം തകര്‍ക്കാനുള്ള പരുക്കന്‍ ശ്രമങ്ങളും ആഴ്‌സണലിന് വിനയായി. 51-ാം മിനിറ്റില്‍ നിക്കോളാസ് പെപ്പേയ്‌ക്ക് ടാക്ലിംഗിന്റെ പേരില്‍ ചുവപ്പുകാര്‍ഡ് കാണേണ്ടിവന്നത് ആഴ്‌സണലിന്റെ ആക്രമണ മൂര്‍ച്ച കുറച്ചു.
Comments