തദ്ദേശ തെരഞ്ഞെടുപ്പ്; ഒന്നാംഘട്ട വോട്ടെടുപ്പ് പൂർത്തിയായി; പോളിംഗ് ശതമാനം 72.03

തിരുവനന്തപുരം: സംസ്ഥാനത്ത് തദ്ദേശ തെരഞ്ഞെടുപ്പിന്റെ ഒന്നാംഘട്ട വോട്ടെടുപ്പ് പൂർത്തിയായി. പ്രാഥമിക കണക്കനുസരിച്ച് 72.03 ശതമാനമാണ് പോളിംഗ്. പൂർണമായ കണക്കുകൾ ഇതുവരെ ലഭ്യമായിട്ടില്ല. രാത്രിയോടെ അന്തിമ കണക്കുകൾ ലഭിക്കുമെന്നാണ് വിവരം.

ആലപ്പുഴയിലാണ് ഏറ്റവും അധികം പോളിംഗ് രേഖപ്പെടുത്തിയത്. 76.42 ശതമാനമാണ് ആലപ്പുഴയിലെ പോളിംഗ്. തിരുവനന്തപുരത്താണ് ഏറ്റവും കുറവ്. 69.07 ശതമാനം. കൊല്ലം 72.79, പത്തനംതിട്ട 69.29, ഇടുക്കി 73.99 എന്നിങ്ങനെയാണ് ജില്ല തിരിച്ചുള്ള പോളിംഗ് കണക്ക്.

തിരുവനന്തപുരം കോർപ്പറേഷനിൽ 59.02 ശതമാനം പേരും കൊല്ലം കോർപ്പറേഷനിൽ 65.11 ശതമാനം പേരും വോട്ട് രേഖപ്പെടുത്തിയെന്നും പ്രാഥമിക കണക്കുകൾ വ്യക്തമാക്കുന്നു. കൊറോണ വൈറസ് വ്യാപനത്തിന്റെ പശ്ചാത്തലത്തിലും മികച്ച പോളിംഗാണ് സംസ്ഥാനത്ത് രേഖപ്പെടുത്തിയത്. വൈകുന്നേരം അഞ്ചു മണി മുതൽ കൊറോണ പോസിറ്റീവായവരും നീരീക്ഷണത്തിൽ കഴിയുന്നവരും വോട്ട് ചെയ്യാനെത്തി.