മകൾ വരച്ച താമരയുടെ ചിത്രം വാട്സ് ആപ്പ് സ്റ്റാറ്റസ് ആക്കി:സിപിഎം വനിതാ നേതാവ് പാർട്ടി മാറുന്നുവെന്ന് പ്രചാരണം

കോട്ടയം: മകൾ വരച്ച താമരയുടെ ചിത്രം വാട്സ് ആപ്പ് സ്റ്റാറ്റസ് ആക്കിയ  സിപിഎം വനിതാ നേതാവിനെതിരെ സൈബർ  പ്രചാരണം. ഏറ്റുമാനൂർ ഏരിയാ കമ്മിറ്റി അംഗവും കർഷക സംഘം സംസ്ഥാന നേതാവുമായ ഗീതാ ഉണ്ണികൃഷ്‌ണനാണ് മകൾ വരച്ച താമരയുടെ ചിത്രം വാട്സ് ആപ്പിൽ സ്റ്റാറ്റസ് ആക്കിയത്. ഇതോടെ ഗീതാ ഉണ്ണികൃഷ്ണൻ ബിജെപിയിൽ ചേരുന്നുവെന്ന പ്രചാരണം ശക്തമായി.

പ്രചാരണം വ്യാജമാണെന്ന് വ്യക്തമാക്കി ഗീതാ ഉണ്ണികൃഷ്‌ണൻ രംഗത്തെത്തി. സാമൂഹിക മാദ്ധ്യമങ്ങളിൽ പ്രചരിക്കുന്നത് വസ്‌തുത വിരുദ്ധമാണെന്നും താനിപ്പോഴും പാർട്ടിയിൽ അടിയുറച്ച് നിൽക്കുകയാണെന്നും ഗീത പ്രതികരിച്ചു.

കോട്ടയം ജില്ലാ ആശുപത്രിയിലെ ഡോക്‌ടറാണ് ഗീതയുടെ  മകൾ അശ്വതി. അശ്വതി  വരച്ച താമരയുടെ ചിത്രമാണ് ഗീത തന്റെ വാട്‌സാപ്പിൽ സ്റ്റാറ്റസാക്കിയത്. ഇതിന് പിന്നാലെയായിരുന്നു  പ്രചാരണം ശക്തമായത്.

ഏറ്റുമാനൂർ നഗരസഭയിൽ 35 അംഗ കൗൺസിലിൽ യു ഡി എഫ് 13, എൽ ഡി എഫ് 12, ബി ജെ പി ഏഴ്, സ്വതന്ത്രർ മൂന്ന് എന്നിങ്ങനെയാണ് കക്ഷി നില.