ഗോൾമഴ പെയ്യിച്ച സിറ്റി ഒന്നാമത്; വെസ്റ്റ് ബ്രോമിനെ തകർത്തത് 5-0ന്; ഗുണ്ടോഗന് ഇരട്ട ഗോൾ

ലൺൻ: ഇംഗ്ലീഷ് പ്രീമിയർ ലീഗിൽ തകർപ്പൻ ജയത്തോടെ മാഞ്ചസ്റ്റർ സിറ്റി തലപ്പത്ത്. വെസ്റ്റ്‌ബ്രോമിനെ എതിരില്ലാത്ത അഞ്ചു ഗോളുകൾക്കാണ് സിറ്റി തകർത്തത്. മത്സരത്തിന്റെ രണ്ടു പകുതികളിലുമായിട്ടാണ് സിറ്റി എതിരാളികളുടെ വല നിറച്ചത്.ഗുണ്ടോഗന്റെ ഇരട്ട ഗോളുകളാണ് സിറ്റിയുടെ ജയം ആധികാരികമാക്കിയത്.

കളിയുടെ 6, 30 മിനിറ്റുകളിലാണ് ഗുണ്ടോഗൻ സിറ്റിക്കായി ഒന്നും മൂന്നും ഗോളടിച്ചത്. ജോ കാൻസെല്ലേ, റിയാദ് മഹ്‌റേസ്, റഹീം സ്റ്റർലിംഗ് എന്നിവരും ഗോളുകൾ നേടി. 20-ാം മിനിറ്റിൽ ജോ രണ്ടാം ഗോൾ നേടി. ആദ്യപകുതിയുടെ അധികസമയത്താണ് റിയാദിന്റെ വക നാലാം ഗോൾ പിറന്നത്. 57-ാം മിനിറ്റിൽ റഹീം അഞ്ചാം ഗോളും സ്വന്തമാക്കി.

ജയത്തോടെ ഗ്വാർഡിയോളയുടെ കുട്ടികൾ 19 കളികളിലായി 41 പോയിന്റുകൾ നേടി. യുണൈറ്റഡ് 40 പോയിന്റുകളുമായി തൊട്ടുപുറകിലുണ്ട്. ലെസ്റ്ററും വെസ്റ്റ്ഹാമും ലിവർപൂളുമാണ് മൂന്നും നാലും അഞ്ചും സ്ഥാനത്തുള്ളത്.