ഓസ്‌ട്രേലിയൻ ഓപ്പൺ: വനിതകളിൽ സെനീനയും ഒസാക്കയും ജയത്തോടെ തുടങ്ങി

മെൽബൺ: സീസണിലെ ആദ്യ ഗ്രാൻഡ് സ്ലാമിൽ മുൻനിര താരങ്ങൾക്ക് ആദ്യ റൗണ്ടിൽ ജയം. എക്കാലത്തേയും ആവേശമായ സെറീന വില്യംസ് തന്റെ 24-ാം ഗ്രാന്റ്സ്ലാം നേട്ടത്തിനിറങ്ങിയ ടൂർണ്ണമെന്റിൽ ആദ്യ ജയം സ്വന്തമാക്കി. ജർമ്മനിയുടെ ലോറാ സിഗ് മണ്ടിനെ 6-1,6-1നാണ് അമേരിക്കൻ താരം തകർത്തുവിട്ടത്.

യു.എസ്.ഓപ്പൺ ചാമ്പ്യൻ നവോമി ഒസാക്ക റഷ്യയുടെ അനസ്താസിയ പൗലോ ചെങ്കോവയെ 6-1,6-2ന് തോൽപ്പിച്ച് രണ്ടാം റൗണ്ടിൽ കടന്നു. ഇതിനിടെ മുൻ ചാമ്പ്യൻ അഞ്ചലീക് കെർബർ പുറത്തായി. അമേരിക്കയുടെ ബെർനാർഡാ പേരയാണ് 6-0,6-4ന് കെർബറെ അട്ടിമറിച്ചത്. സെറീനയുടെ മൂത്ത സഹോദരി വീനസ് വില്യംസും രണ്ടാം റൗണ്ടിലെത്തി. ബെൽജിയത്തിന്റെ കേസ്റ്റൺ ഫ്‌ലിപ്‌കെൻസിനെ 7-5, 6-2നാണ് വീനസ് മറികടന്നത്.

ഇവർക്കൊപ്പം ഫ്രഞ്ച് ഓപ്പൺ ചാമ്പ്യൻ ഇഗാ സ്വിയാതീക് നെതർലാന്റ്‌സിന്റെ അരാന്തയെ തോൽപ്പിച്ചപ്പോൾ സ്വെത്വാനാ പിരങ്കോവ തായ്വാന്റെ ഹെസീ സൂ വീയോട് പരാജയപ്പെട്ടു.