മിമിക്രി കലാകാരനും നടനുമായ കോട്ടയം നസീറിന് വരയ്‌ക്കാനുള്ള കഴിവ് കൂടിയുണ്ടെന്ന് തിരിച്ചറിഞ്ഞത് കഴിഞ്ഞ ലോക്ക്ഡൗണ്‍ കാലത്താണ്. ആ സമയത്ത് താരം വച്ചിരുന്ന ചിത്രങ്ങളെല്ലാം തന്നെ സോഷ്യല്‍ മീഡിയയില്‍ ഏറെ ശ്രദ്ധിക്കപ്പെട്ടിരുന്നു.കൊറോണ വ്യാപനത്തില്‍ ചെറിയ ഒരയവു വന്നതോടുകൂടി സിനിമകളും ഷൂട്ടിങും പുനരാരംഭിച്ചു. എന്നാല്‍ ഇപ്പോള്‍ രണ്ടാം തരംഗം രൂക്ഷമായതോടെ രാജ്യം വീണ്ടും അടച്ചു പൂട്ടിയിരിക്കുന്നു.
അതോടെ വീണ്ടും തന്റെ ചായക്കൂട്ടുകളുമായി നസീര്‍ രംഗത്തെത്തി. ഇപ്പോള്‍ സോഷ്യല്‍ മീഡിയയില്‍ വൈറലായി കൊണ്ടിരിക്കുന്നത് കോട്ടയം നസീറിന്റ മനോഹരമായ ഒരു ഓയില്‍ പെയിന്റിങാണ്. മനോജ് കെ ജയന്‍ എന്ന നടന്റെ ഏറ്റവും മികച്ച കഥാപാത്രങ്ങളിലൊന്നായ ദിഗംബരനെയാണ് നസീര്‍ ക്യാന്‍വാസില്‍ പകര്‍ത്തിയത്. മനോജ് കെ ജയന്‍ ഈ ചിത്രം സോഷ്യല്‍ മീഡിയയില്‍ പങ്കുവെച്ചു.
‘ കോട്ടയം നസീര്‍ എന്ന് കേള്‍ക്കുമ്പോള്‍ മലയാളികളുടെ മനസ്സില്‍ തെളിയുന്ന ഒരു രൂപമുണ്ട്. മൈക്ക് കയ്യില്‍ കിട്ടിയാല്‍ ആരുടെ ശബ്ദത്തിലേക്കും പരകായപ്രവേശം നടത്താനുള്ള മാന്ത്രികവിദ്യ വശമുള്ള അതുല്യ മിമിക്രി കലാകാരന്‍!. അതിലുപരി മികച്ച ഒരു ചിത്രകാരന്‍ കൂടിയാണ് നസീര്‍. ഒരുതരത്തില്‍ പറഞ്ഞാല്‍ ക്യാന്‍വാസില്‍ തെളിയുന്ന അനുകരണമാണല്ലോ ചിത്രകല.. ദിഗംബരന്റെ മനോഹരമായ ഈ ഓയില്‍ പെയ്ന്റിങ് എന്റെ മനസ്സിലാണ് നസീര്‍ വരച്ചിരിക്കുന്നത് … ഒരിക്കലും മായില്ല നന്ദി… സുഹൃത്തേ… ഒരു കോട്ടയംകാരന് മറ്റൊരു കോട്ടയംകാരന് നല്‍കിയ വലിയൊരു അംഗീകാരമായും ഞാന്‍ കാണുന്നു. വര്‍ഷങ്ങളായി നസീറുമായി സുഹൃത്തെന്ന നിലയിലും കലാകാരനെന്ന നിലയിലും നാട്ടുകാരന്‍ എന്ന നിലയിലും വലിയ അടുപ്പമുണ്ട്. ഇത് നസീര്‍ എനിക്ക് തന്ന വലിയൊരു വിലപ്പെട്ട സമ്മാനമാണ്, കോട്ടയം നസീര്‍ എന്ന ചിത്രകാരന്റെ മുഴുവന്‍ പ്രതിഭയും ഇതില്‍ കാണാന്‍ കഴിയുന്നു.‘
എന്ന കുറിപ്പോടെയാണ് താരം ഫേയ്‌സ്ബുക്കില്‍ ഈ ചിത്രം പങ്കുവെച്ചത്.
Comments