വാക്‌സിനുകളുടെ മിശ്രിതരൂപം കൂടുതൽ ഫലപ്രദമെന്ന് ഐസിഎംആർ

ന്യൂഡൽഹി: കൊറോണ പ്രതിരോധ വാക്‌സിനുകളായ കൊവിഷീൽഡും കൊവാക്‌സിനും മിശ്രണം ചെയ്യുന്നതിലൂടെ കൂടുതൽ ഫലപ്രാപ്തി ലഭിക്കുമെന്ന് ഐസിഎംആറിന്റെ കണ്ടെത്തൽ. ഇരുവാക്‌സിനുകളും കലർത്തി നൽകുന്നത് സുരക്ഷിതമാണെന്നും മികച്ച രോഗപ്രതിരോധ ശേഷിക്ക് സഹായിക്കുമെന്നും പഠനത്തിൽ തെളിഞ്ഞതായി ഐസിഎംആർ അറിയിച്ചു.

ആദ്യ ഡോസ് കൊവിഷീൽഡും രണ്ടാം ഡോസ് കൊവാക്‌സിനും അബദ്ധത്തിൽ ചിലർ കുത്തിവെയ്‌പ്പെടുത്തിരുന്നു. ഇവരിൽ ഐസിഎംആർ നടത്തിയ പഠനത്തിലാണ് വാക്‌സിനുകളുടെ മിശ്രിതരൂപം ഫലഫ്രദമാണെന്ന് കണ്ടെത്തിയത്.

ഇന്ത്യയിൽ മൂന്നാം തരംഗം പ്രതീക്ഷിക്കുന്ന സാഹചര്യത്തിൽ ആൽഫ, ബീറ്റ, ഡെൽറ്റ തുടങ്ങിയ വൈറസ് വകഭേദങ്ങളെ ശക്തമായി പ്രതിരോധിക്കാൻ മിശ്രിത വാക്‌സിന് കഴിയുമെന്നും പഠനങ്ങൾ സൂചിപ്പിക്കുന്നു. എന്നിരുന്നാലും സർക്കാരിന്റെ ഔദ്യോഗിക പ്രഖ്യാപനവും അനുവാദവും കൂടാതെ ജനങ്ങൾ വ്യത്യസ്ത വാക്‌സിനുകളുടെ ഡോസുകളെടുത്ത് പരീക്ഷിക്കരുതെന്നും ഐസിഎംആർ നിർദേശിച്ചു.