ന്യൂഡൽഹി : പ്രധാൻമന്ത്രി കിസാൻ സമ്മാൻ നിധി (പിഎം-കിസാൻ) പദ്ധതിയുടെ കീഴിലുള്ള സാമ്പത്തിക ആനുകൂല്യത്തിന്റെ അടുത്ത ഗഡു ഇന്ന് വിതരണം ചെയ്യും. പ്രധാനമന്ത്രി നരേന്ദ്ര മോദി വീഡിയോ കോൺഫറൻസ് വഴി പദ്ധതി ഉദ്ഘാടനം ചെയ്യും. കേന്ദ്ര സർക്കാർ പദ്ധതിയിലൂടെ 19,500 കോടിയിലധികം രൂപ കർഷകർക്ക് ഇന്ന് വിതരണം ചെയ്യും.
9 കോടി 75 ലക്ഷം കർഷക കുടുംബങ്ങൾക്ക് കേന്ദ്രത്തിന്റെ ധനസഹായം ലഭിക്കും. ഉച്ചക്ക് 12.30 ന് നടക്കുന്ന ചടങ്ങിൽ പ്രധാനമന്ത്രി രാജ്യത്തെ അഭിസംബോധന ചെയ്ത ശേഷം കർഷകരുമായി സംവദിക്കും. കേന്ദ്ര കൃഷിമന്ത്രി നരേന്ദ്ര സിംഗ് തോറും ചടങ്ങിൽ പങ്കെടുക്കും.
നരേന്ദ്ര മോദി സർക്കാറിന്റെ ജനകീയ പദ്ധികളിലൊന്നാണ് പ്രധാനമന്ത്രി കിസാൻ സമ്മാൻ നിധി. 6000 രൂപ കർഷക കുടുംബങ്ങൾക്ക് പ്രതിവർഷം നൽകുന്നതാണ് പദ്ധതി. മൂന്നു ഘട്ടമായി 2000 രൂപ വീതം അർഹരായവരുടെ ബാങ്ക് അക്കൗണ്ടിലേക്ക് നേരിട്ട് ലഭ്യമാക്കുകയാണ്. പദ്ധതിയിൽ, 1.38 ലക്ഷം കോടി രൂപ ഇതുവരെ കർഷക കുടുംബങ്ങൾക്ക് കൈമാറിയിട്ടുണ്ട്.
Comments