പ്രീമിയർലീഗ്: തകർപ്പൻ ജയവുമായി സിറ്റി; മുന്നേറി ലിവർപൂൾ

ലണ്ടൻ: ഇംഗ്ലീഷ് പ്രീമിയർ ലീഗിൽ മാഞ്ചസ്റ്റർ സിറ്റിയും ലിവർപൂളും മുന്നേറി. മാഞ്ചസ്റ്റർ സിറ്റി നോർവിച്ച് സിറ്റിയേയും ലിവർപൂൾ ബേൺലിയേയും തോൽപ്പിച്ചു. മറ്റ് മത്സരങ്ങളിൽ ആസ്റ്റൺ വില്ല ന്യൂകാസിലിനെയും ബ്രൈറ്റൺ വാട്ടഫോഡിനേയും കീഴടക്കി. ക്രിസ്റ്റൽ പാലസ് ബ്രെന്റ്‌ഫോഡ് മത്സരവും, എവർട്ടൺ-ലീഡ്‌സ് യുണൈറ്റഡ് പോരാട്ടവും സമനിലയിൽ പിരിഞ്ഞു.

ത്രസിപ്പിക്കുന്ന ജയമാണ് സിറ്റി നേടിയത്. എതിരില്ലാത്ത അഞ്ചു ഗോളുകൾക്കാണ് നോർവിച്ചിനെ തകർത്തത്. ടിം കേൾ(7- സെൽഫ് ഗോൾ), ജാക് ഗ്രീലിഷ്(22) , അയ്‌മെറിക് ലാപോർട്ടേ(64), റഹിം സ്റ്റെർലിംഗ്(71), റിയാദ് മഹരേസ്(84) എന്നിവരാണ് ഗോളടിച്ചത്. എഫ് എ കമ്യൂണിറ്റി ഷീൽഡ് മത്സരത്തിൽ ലെസറ്ററിനോടും പ്രീമിയർലീഗിൽ ടോട്ടനത്തിനോടും തോറ്റശേഷമുള്ള ശക്തമായ തിരിച്ചുവരവാണ് സിറ്റി ഇന്നലെ നടത്തിയത്.

ലിവർപൂൾ ബേൺലിയെ 2-0നാണ് തോൽപ്പിച്ചത്. ഡിയോഗെ ജോട്ട(18), സദിയോ മാനേ(69) എന്നിവരാണ് ചെമ്പടയ്‌ക്കായി ഗോൾ നേടിയത്.