കിറ്റക്‌സിനെതിരെ ശബ്ദിച്ചാൽ ബോംബെറിഞ്ഞ് കൊല്ലും; എൽദോസ് കുന്നപ്പള്ളി എംഎൽഎയ്‌ക്ക് ഐഎസ് വധഭീഷണി

കൊച്ചി : പെരുമ്പാവൂർ എംഎൽഎ എൽദോസ് കുന്നപ്പളളിയ്‌ക്ക് ഇസ്ലാമിക് സ്റ്റേറ്റിന്റെ വധ ഭീഷണി. ബോംബെറിഞ്ഞ് കൊല്ലുമെന്ന് ഭീഷണിപ്പെടുത്തിക്കൊണ്ടുള്ള കത്ത് എംഎൽഎയ്‌ക്ക് ലഭിച്ചു. സംഭവത്തിൽ എൽദോസ് കുന്നപ്പള്ളി മുഖ്യമന്ത്രിയ്‌ക്ക് പരാതി നൽകി.

കഴിഞ്ഞ ദിവസമാണ് കത്ത് ലഭിച്ചത്. കിറ്റക്‌സ് ഗ്രൂപ്പിനെതിരെ ശബ്ദിച്ചാൽ കൊന്നുകളയുമെന്നാണ് കത്തിലുള്ളത്. അബ്ദുൾ റഹിമാൻ എന്നയാളുടെ പേരിലാണ് കത്ത്. വിലാസവും കത്തിൽ കുറിച്ചിട്ടുണ്ട്. ഇത് ശരിയായ വിലാസമാണോയെന്നതിൽ പോലീസ് അന്വേഷണം പുരോഗമിക്കുകയാണ്.

ഉമ്മൻ ചാണ്ടിയുൾപ്പെടെയുള്ള കോൺഗ്രസ് നേതാക്കൾക്കെതിരെയും കത്തിൽ രൂക്ഷ വിമർശനമുണ്ട്. കിഴക്കമ്പലത്തെ കോൺഗ്രസ് പ്രവർത്തകരുടെ കയ്യിലിരിപ്പുകൊണ്ടാണ് പഞ്ചായത്ത് ഭരണം ട്വന്റി ട്വന്റിക്ക് ലഭിച്ചത്. കാളപെറ്റെന്ന് കേട്ടാൽ കയറെടുക്കുന്ന ആളാണ് പിടി തോമസ്. അയാൾ വിചാരിച്ചാൽ ട്വന്റി ട്വന്റിയെ തകർക്കാനാകില്ലെന്നും കത്തിൽ പറയുന്നു. സൂക്ഷിച്ചാൽ ദു:ഖിക്കേണ്ടെന്നും കത്തിൽ മുന്നറിയിപ്പുണ്ട്.

മുഴുവൻ യുഡിഎഫ് എംഎൽഎമാർക്കും ഭീഷണിക്കത്ത് അയച്ചിട്ടുണ്ടെന്ന് പറഞ്ഞാണ് എഴുത്ത് അവസാനിക്കുന്നത്.