ഇടുക്കി ഡാമിലെ ജലനിരപ്പ് ഉയരുന്നു; ബ്ലൂ അലർട്ട് പ്രഖ്യാപിച്ചു; ആശങ്ക വേണ്ടെന്ന് കെഎസ്ഇബി

ഇടുക്കി : ഇടുക്കി ഡാമിൽ ജലനിരപ്പുയർന്ന സാഹചര്യത്തിൽ പ്രദേശത്ത് ആദ്യത്തെ ജാഗ്രത നിർദേശം ആയ ബ്ലൂ അലർട്ട് പുറപ്പെടുവിച്ചു. ഇടുക്കി ഡാമിലെ ജലനിരപ്പ് സംഭരണ പരിധിയോട് അടുക്കുന്ന പശ്ചാത്തലത്തിലാണ് നടപടി. നിലവിൽ 2390.86 അടിയാണ് ജലനിരപ്പ്. 2403 അടിയാണ് ഡാമിന്റെ പരമാവധി സംഭരണ ശേഷി. അതേസമയം ആശങ്ക വേണ്ടെന്നാണ് കെഎസ്ഇബി അധികൃതർ പറയുന്നത്.

ഡാമിലെ ജലനിരപ്പ് 2396.86 അടിയിലെത്തിയാൽ ഓറഞ്ച് അലർട്ട് പ്രഖ്യാപിക്കും. 2397.86 അടിയിലെത്തിയാൽ റെഡ് അലർട്ടും പുറപ്പെടുവിക്കും. പരമാവധി സംഭരണ പരിധിയിലെത്തുന്നതിന്റെ 36 മണിക്കൂർ മുൻപെങ്കിലും ബ്ലൂ അലർട്ട് പ്രഖ്യാപിക്കണമെന്നാണ് കേന്ദ്ര ജല കമ്മീഷൻ നിർദേശം. ഇതേത്തുടർന്നുള്ള മുൻകരുതൽ നടപടിയുടെ ഭാഗമായിട്ടാണ് നടപടി.

നിലവിൽ ഡാമിന്റെ വൃഷ്ടിപ്രദേശത്ത് മഴ പെയ്യുന്നില്ല. നീരൊഴുക്കും കുറവാണ്. അതുകൊണ്ട് തന്നെ നിലവിലെ അവസ്ഥയിൽ ഡാമിലെ ജലനിരപ്പ് ഇനി ഉയരാൻ സാധ്യതയില്ലെന്നാണ് സൂചന. അതേസമയം കേരളത്തിൽ ഇന്നും നാളെയും ശക്തമായ മഴ പെയ്യുമെന്നാണ് കാലാവസ്ഥാ നിരീക്ഷകരുടെ പ്രവചനം.