മുംബൈ : ബോളിവുഡിലെ ലഹരി ഉപയോഗം പരസ്യമായ രഹസ്യമാണ്. എന്നാൽ ഷാരൂഖ് ഖാന്റെ മകൻ ആര്യൻ ഖാന്റെ അറസ്റ്റോടെയാണ് ഇതേക്കുറിച്ച് ഗൗരവമായുള്ള ചർച്ചകൾ ആരംഭിച്ചത്. ആഡംബര കപ്പലിലെ ലഹരി പാർട്ടിയ്‌ക്കിടെ ആര്യൻ ഖാൻ അറസ്റ്റിലായതിന് പിന്നാലെ ഷാരൂഖിനെയും കുടുംബത്തെയും വിമർശിച്ച് നിരവധി പേരാണ് രംഗത്തെത്തിയത്. മകന്റെ ലഹരി ഉപയോഗത്തെ പിന്തുണച്ചു കൊണ്ടുള്ള ഷാരൂഖ് ഖാന്റെ പഴയ അഭിമുഖം ഉൾപ്പെടെ കുത്തിപ്പൊക്കിയായിരുന്നു വിമർശനങ്ങളേറെയും. ഇപ്പോഴിതാ ഷാരൂഖ് ഖാൻ മക്കളെക്കുറിച്ച് പറഞ്ഞ വാക്കുകളാണ് സമൂഹമാദ്ധ്യമങ്ങളിൽ വ്യാപകമായി പ്രചരിക്കുന്നത്.
2014 ലെ ഫാദേഴ്‌സ് ഡേയിൽ ഷാരൂഖ് ഖാൻ മക്കളെക്കുറിച്ച് പറഞ്ഞ ചില പരാമർശങ്ങളാണ് ഇപ്പോൾ സമൂഹമാദ്ധ്യമം ഏറ്റെടുത്തിരിക്കുന്നത്. തന്റെ മക്കൾ ആരോഗ്യത്തോടെയും സന്തോഷത്തോടെയും ജീവിക്കുന്നതാണ് കാണേണ്ടത്. അവർക്ക് ഇഷ്ടമുള്ളതൊക്കെ ചെയ്യാൻ കഴിയണം. സന്തോഷം നൽകുന്നതും, ആരോഗ്യപരവുമായ കാര്യങ്ങളെല്ലാം അവർ ചെയ്യണം. മക്കളോട് അഭിനേതാക്കാൾ ആകാനോ എഞ്ചിനിയർ ആകാനോ പറയില്ല. ആഗ്രഹമുള്ളത് ആകാൻ അവർക്ക് കഴിയണമെന്നുമായിരുന്നു ഷാരൂഖ് ഖാൻ പറഞ്ഞത്.
തനിക്കും മക്കൾക്കും ഒരുപോലെയുള്ളത് കവിളിലെ നുണക്കുഴികൾ ആണ്. തന്റെ ശീലങ്ങൾ കുട്ടികൾക്കില്ല. അതിന് ദൈവത്തോട് നന്ദി പറയുന്നു. അവർ നല്ല കുട്ടികളാണ്. തന്റെ കുട്ടികൾ തന്നെക്കാൾ വലിയ മനുഷ്യരാണെന്നും ഷാരൂഖ് പറഞ്ഞിരുന്നു.
Comments