സംസ്ഥാനത്ത് 105 ദുരിതാശ്വാസ ക്യാമ്പുകൾ; ജനങ്ങൾ കൊറോണ മാനദണ്ഡങ്ങൾ വിസ്മരിക്കരുതെന്ന് മുഖ്യമന്ത്രി

തിരുവനന്തപുരം: സംസ്ഥാനത്ത് കനത്ത മഴയെ തുടർന്ന് വിവിധ ജില്ലകളിൽ ദുരിതാശ്വാസ ക്യാമ്പുകൾ തുറന്ന സാഹചര്യത്തിൽ ജനങ്ങൾ കൊറോണ മാനദണ്ഡങ്ങൾ വിസ്മരിക്കരുതെന്ന് മുഖ്യമന്ത്രി പിണറായി വിജയൻ. ക്യാമ്പുകളിൽ പ്രോട്ടോകോളുകൾ പാലിക്കാൻ ബന്ധപ്പെട്ടവർ ശ്രദ്ധിക്കണമെന്നും മുഖ്യമന്ത്രി ഓർമിപ്പിച്ചു.

ക്യാമ്പുകളിൽ കഴിയുന്നവർ ആവശ്യമായ ശാരീരിക അകലം പാലിക്കാനും മാസ്‌ക് ധരിക്കാനും ശ്രദ്ധിക്കണം. കൂട്ടം കൂടി ഇടപഴകാൻ പാടുള്ളതല്ല. ഒരു ക്യാമ്പിൽ പ്രോട്ടോകോൾ അനുസരിച്ച് എത്ര ആളുകളെ ഉൾക്കൊള്ളിക്കാൻ കഴിയുമെന്ന് മുൻകൂട്ടി തിട്ടപ്പെടുത്തണം. കൂടുതൽ ആളുകൾ വന്നാൽ ക്യാമ്പുകൾ വർദ്ധിപ്പിക്കാൻ ജില്ലാ കലക്ടർമാർക്ക് നിർദേശം നൽകിയിട്ടുണ്ടെന്നും മുഖ്യമന്ത്രി അറിയിച്ചു.

കേരളത്തിൽ വിവിധയിടങ്ങളിലായി 105 ദുരിതാശ്വാസ ക്യാമ്പുകളാണ് പ്രവർത്തനമാരംഭിച്ചത്. കോട്ടയം ജില്ലയിൽ മാത്രം 33ഓളം ക്യാമ്പുകൾ തുറന്നിട്ടുണ്ട്. ആവശ്യം വന്നാൽ കൂടുതൽ ക്യാമ്പുകൾ അതിവേഗം ആരംഭിക്കാനുള്ള സജ്ജീകരണങ്ങൾ ഒരുക്കിയതായും സർക്കാർ അറിയിച്ചു. മഴ നിലയ്‌ക്കാത്ത സാഹചര്യത്തിൽ ജനങ്ങൾ അതീവ ജാഗ്രത പുലർത്തണമെന്നും അപകട സാഹചര്യങ്ങളിൽ പെടാതിരിക്കാൻ മുൻകരുതലുകൾ സ്വീകരിക്കണമെന്നും മുഖ്യമന്ത്രി നിർദേശം നൽകിയിട്ടുണ്ട്.