ബീഹാർ നിയമസഭ ശതാബ്ദി നിറവിൽ; ആഘോഷങ്ങൾ രാഷ്‌ട്രപതി ഉദ്ഘാടനം ചെയ്യും

പാട്‌ന: ബീഹാർ നിയമസഭ ശതാബ്ദി വർഷത്തിൽ. ഒരു വർഷം നീണ്ടുനിൽക്കുന്ന ശതാബ്ദി ആഘോഷം രാഷ്‌ട്രപതി രാംനാഥ് കോവിന്ദ് ഉദ്ഘാടനം ചെയ്യും. 2017ൽ ഇന്ത്യയുടെ രാഷ്‌ട്രപതിയാകും മുമ്പ് രാംനാഥ് കോവിന്ദ് ബീഹാറിലെ ഗവർണർ പദവി അലങ്കരിച്ചു എന്നതും ചടങ്ങിന് മാറ്റുകൂട്ടുന്നു. രണ്ടു ദിവസം രാഷ്‌ട്രപതി ബീഹാറിൽ തങ്ങും.

1921 ഫെബ്രുവരി 7നാണ് ബീഹാർ-ഒഡീഷ സംയുക്ത പ്രവിശ്യാ നിയമസഭ ബ്രിട്ടീഷ് ഭരണകാലത്ത് രൂപീകരിക്കപ്പെട്ടത്. സന്ദർശനത്തിന്റെ ഭാഗമായി രാംനാഥ് കോവിന്ദ് ബീഹാറിലെ നിയമസഭാ സാമാജികരെ അഭിസംബോധന ചെയ്യും. ശതാബ്ദി സ്തംഭം സ്ഥാപിക്കുന്ന രാംനാഥ് കോവിന്ദ് പിന്നീട് ബോധിവൃക്ഷവും നടും. രണ്ടു ദിവസത്തെ സന്ദർശനത്തിൽ ഗുരുഗോവിന്ദ് സിംഹന്റെ ജന്മദേശത്തും മഹാവീർ ക്ഷേത്രത്തിലും ദർശനം നടത്തുമെന്ന് രാഷ്‌ട്രപതി ഭവൻ അറിയിച്ചു.