ബിജിംഗ് : ചൈനയിൽ കൊറോണ വീണ്ടും പിടിമുറുക്കുന്നതായി റിപ്പോർട്ട്. ഈ സാഹചര്യത്തിൽ നിയന്ത്രണങ്ങൾ കൂടുതൽ കടുപ്പിക്കാൻ ചൈനീസ് സർക്കാർ തീരുമാനിച്ചു. ഇതിനെതുടർന്ന് രോഗവ്യാപനം വീണ്ടും ഉണ്ടായ സ്ഥലങ്ങളിലേക്കും പുറത്തേക്കുമുള്ള യാത്രകൾക്ക് നിരോധനം ഏർപ്പെടുത്തി.
രോഗവ്യാപനം കൂടിയ മേഖലകളിലേക്ക് യാത്ര നടത്തി തിരികെ എത്തിയവർ പ്രാദേശിക അധികൃതരെ വിവരം അറിയിച്ച് സ്വയം ക്വാറന്റീനിൽ പോകേണ്ടതാണെന്ന് നിർദ്ദേശമുണ്ട്.
16 മുനിസിപ്പാലിറ്റികളിലും നിരവധി പ്രവിശ്യകളിലും ഗ്രാമപ്രദേശങ്ങളിലും കൊറോണ വ്യാപനം വീണ്ടും റിപ്പോർട്ട് ചെയ്തിട്ടുണ്ട്. ഇവിടങ്ങളിലുള്ളവർക്ക് കർശനമായ യാത്രാ നിയന്ത്രണങ്ങൾ ഏർപ്പെടുത്തി.രോഗ വ്യാപനമുള്ളയിടത്ത് ആരോഗ്യപ്രവർത്തകർ നിരന്തരം പരിശോധനകൾ നടത്തുന്നുണ്ട്. അതേസമയം ചൈനയിൽ കമ്യൂണിസ്റ്റ് പാർട്ടി പ്ലീനം നടക്കാനിരിക്കെ രോഗവ്യാപനം രൂക്ഷമാകുന്നത് സർക്കാരിന് തലവേദനയായി തീർന്നിരിക്കുകയാണ്.
