കൊവാക്‌സിന് അംഗീകാരം: ഇന്ത്യയ്‌ക്ക് അഭിനന്ദനവുമായി ഡബ്ല്യുഎച്ച്ഒ ചീഫ് സയന്റിസ്റ്റ് സൗമ്യ സ്വാമിനാഥൻ

ജെനീവ: ഇന്ത്യയുടെ തദ്ദേശീയ കൊറോണ പ്രതിരോധ വാക്‌സിനായ കൊവാക്‌സിന് ലോകാരോഗ്യ സംഘടനയുടെ അംഗീകാരം ലഭിച്ചതിൽ അഭിനന്ദനങ്ങൾ അറിയിച്ച് ഡബ്ല്യൂഎച്ച്ഒയുടെ ചീഫ് സയന്റിസ്റ്റ് സൗമ്യ സ്വാമിനാഥൻ. ഹൈദരാബാദ് ആസ്ഥാനമായി പ്രവർത്തിക്കുന്ന ഭാരത് ബയോടെക് നിർമിച്ച കൊവാക്‌സിന് അടിയന്തിര ഉപയോഗം നടത്താനുള്ള അനുമതിയായിരുന്നു ലോകാരോഗ്യ സംഘടന നൽകിയത്.

ഒരു വാക്‌സിൻ കൂടി അടിയന്തിര ഉപയോഗ അനുമതി നേടിയിരിക്കുകയാണ്. വാക്‌സിൻ നിർമിച്ചതിനും വ്യാപക വാക്‌സിനേഷൻ വിജയകരമായി പൂർത്തിയാക്കിയതിനും ഇന്ത്യയ്‌ക്ക് അഭിനന്ദനങ്ങൾ അറിയിക്കുകയാണെന്നും സൗമ്യ സ്വാമിനാഥൻ ട്വിറ്ററിലൂടെ അറിയിച്ചു. ലോകാരോഗ്യ സംഘടന അംഗീകരിക്കുന്ന എട്ടാമത്തെ വാക്സിനാണ് കൊവാക്സിൻ.

വാക്‌സിന്റെ ഫലപ്രാപ്തി സംബന്ധിച്ച് കൂടുതൽ വിവരങ്ങൾ ഭാരത് ബയോടെക് ലോകാരോഗ്യ സംഘടനയ്‌ക്ക് മുൻപാകെ ഹാജരാക്കിയതിന് പിന്നാലെയാണ് അംഗീകാരം ലഭിച്ചിരിക്കുന്നത്. കഴിഞ്ഞ മാസം അവസാനം അംഗീകാരം ലഭിക്കുമെന്ന സൂചനകൾ ഉണ്ടായിരുന്നെങ്കിലും തീരുമാനം നീണ്ടുപോവുകയായിരുന്നു.

മാസങ്ങൾ നീണ്ട കടമ്പകൾക്കും കാത്തിരിപ്പുകൾക്കും ഒടുവിലാണ് ലോകാരോഗ്യ സംഘടനയുടെ അംഗീകാരം കൊവാക്‌സിനെ തേടിയെത്തിയത്. ഇതോടെ കൊവാക്സിൻ എടുത്തവരുടെ വിദേശയാത്രാ പ്രശ്നത്തിന് പരിഹാരമാകും.

കൊവാക്സിന് ലോകത്തിന്റെ അംഗീകാരം ലഭിച്ച സാഹചര്യത്തിൽ വൈറസിനെതിരെ ആഗോളതലത്തിൽ പോരാട്ടം നടത്താൻ തദ്ദേശീയ വാക്സിന് സാധിക്കും. വാക്സിൻ കയറ്റുമതി ഊർജിതമാക്കുന്നതിലൂടെ ഇന്ത്യയ്‌ക്ക് വാണിജ്യാടിസ്ഥാനത്തിൽ വലിയ പ്രയോജനം കൈവരിക്കാൻ സാധിക്കുമെന്നതും അംഗീകാരത്തിന്റെ നേട്ടമാണ്.