ഇടുക്കി; കനത്ത മഴയെ തുടർന്ന് ഇടുക്കിയിലെ വിവിധയിടങ്ങളിൽ വ്യാപക നാശനഷ്ടങ്ങൾ. പാലാറ്റിൽ മണ്ണിടിച്ചിൽ ഉണ്ടായതിനെ തുടർന്ന് പ്രദേശവാസികളെ മാറ്റി പാർപ്പിച്ചു. നെടുങ്കണ്ടത്ത് ശക്തമായ മഴയാണ് തുടരുന്നത്. ജില്ലയിൽ ഇന്ന് ഓറഞ്ച് അലർട്ടാണ് പ്രഖ്യാപിച്ചിരുന്നത്. നാളെയും അതിശക്തമായ മഴ തുടരുമെന്നാണ് കാലാവസ്ഥാ വകുപ്പിന്റെ പ്രവചനം.
തൂക്കുപാലം പ്രദേശത്ത് വെള്ളപ്പൊക്കം റിപ്പോർട്ട് ചെയ്തു. നിരവധി വീടുകളിൽ വെള്ളം കയറിയതായാണ് വിവരം. റവന്യൂ സംഘം സ്ഥലത്തെത്തിയിട്ടുണ്ട്. ഫയർഫോഴ്‌സും നാട്ടുകാരും ചേർന്ന് അപകട ഭീഷണിയുള്ള പ്രദേശങ്ങളിലെ വീടുകളിൽ നിന്നും ആളുകളെ ഒഴിപ്പിക്കുകയാണ്.
കല്ലാറിലെ വൃഷ്ടിപ്രദേശങ്ങളിൽ ശക്തമായ മഴ തുടരുന്നതിന്റെ പശ്ചാത്തലത്തിൽ കല്ലാർ അണക്കെട്ടിന്റെ രണ്ട് ഷട്ടറുകൾ തുറക്കാൻ തീരുമാനമായി. 10 സെന്റീമീറ്റർ വീതമാണ് തുറക്കുന്നത്. 10 ക്യൂമിക്‌സ് വെള്ളം ഒഴുക്കി വിടുമെന്ന് അധികൃതർ അറിയിച്ചു. പുഴയുടെ ഇരുകരകളിലുമുള്ളവർ ജാഗ്രത പാലിക്കണമെന്ന് നിർദേശമുണ്ട്.
Comments