തിരുവനന്തപുരം: കേരളത്തിൽ ഇന്ന് ഒറ്റപ്പെട്ട ശക്തമായ മഴയ്‌ക്ക് സാധ്യതയെന്ന് കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്. ഒമ്പത് ജില്ലകളിൽ യെല്ലോ അലർട്ട് പ്രഖ്യാപിച്ചു. വടക്കൻ കേരളത്തിൽ മഴ അതിശക്തമാകുമെന്നാണ് പ്രവചനം. പത്തനംതിട്ട, കോട്ടയം, ഇടുക്കി, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർകോട് എന്നീ ജില്ലകളിലാണ് യെല്ലോ അലർട്ട് പ്രഖ്യാപിച്ചിട്ടുള്ളത്.
ബംഗാൾ ഉൾക്കടലിൽ രൂപംകൊണ്ട തീവ്രന്യൂനമർദ്ദം വരും മണിക്കൂറുകളിൽ വടക്കൻ തമിഴ്‌നാട് തീരത്തിന്റെ കര തൊടും. പുതുച്ചേരിക്കടുത്ത് കരയിൽ പ്രവേശിക്കാനാണ് സാദ്ധ്യത. നാളെയോടെ ബംഗാൾ ഉൾക്കടലിൽ പുതിയ ന്യൂനമർദ്ദം രൂപപ്പെട്ടേക്കുമെന്നും മുന്നറിയിപ്പുണ്ട്.
തമിഴ്‌നാട്ടിൽ ഇന്നും ശക്തമായ മഴ തുടരുമെന്നാണ് പ്രവചനം. ചെന്നൈ ഉൾപ്പെടെ എട്ട് ജില്ലകളിൽ റെഡ് അലർട്ട് പ്രഖ്യാപിച്ചിട്ടുണ്ട്. 24 ജില്ലകളിലെ വിദ്യാഭ്യാസ സ്ഥാപനങ്ങളിൽ നാളെയും മറ്റന്നാളും അവധിയാണ്. തീരദേശത്ത് ജാഗ്രത നിർദേശം നൽകിയിട്ടുണ്ട്. ആന്ധ്രാ-പുതുച്ചേരി തീരങ്ങളിലും മഴ അതിതീവ്രമാകുമെന്നാണ് മുന്നറിയിപ്പ്.
Comments