ഓസ്‌ട്രേലിയൻ സ്പിന്നർ ഷെയ്ൻ വോണിനും മകനും വാഹനാപകടത്തിൽ പരിക്ക്

മെൽബൺ: ഓസ്‌ട്രേലിയൻ സ്പിൻ ഇതിഹാസം ഷെയ്ൻ വോണിനും മകൻ ജാക്ക്‌സണും ബൈക്ക് അപകടത്തിൽ പരിക്ക്. അപകടത്തിൽ ഏകദേശം 15 മീറ്ററോളം ബൈക്ക് തെന്നി നീങ്ങിയതിനെ തുടർന്ന് താരത്തിന്റെ ഇടുപ്പിനും കാലിനും നിസ്സാര പരിക്കുപറ്റിയിട്ടുണ്ട്.

ഞാറാഴ്ചയായിരുന്നു അപകടമുണ്ടായത്. കാര്യമായ പരിക്കുകൾ ഇല്ലാതിരുന്നതിനാൽ ആശുപത്രിയിൽ പോകാതെ വോൺ തിരികെ വീട്ടിലെത്തി. എന്നാൽ പിന്നീട് വേദന കലശലായതിനെ തുടർന്നാണ് ചികിത്സയ്‌ക്കായി താരം ആശുപത്രിയിലെത്തിയത്. അപകടത്തിൽ വോണിന്റെ കാലിന് ചെറിയ ചതവ് പറ്റിയിട്ടുണ്ടെന്ന് ഡോക്ടർമാർ അറിയിച്ചു.

ടെസ്റ്റ് ക്രിക്കറ്റിൽ ഓസ്ട്രേലിയയുടെ എക്കാലത്തെയും മികച്ച വിക്കറ്റ് വേട്ടക്കാരനായ വോൺ, ഡിസംബർ എട്ടിന് ആരംഭിക്കുന്ന ആഷസ് പരമ്പരയിൽ കമന്റേറ്റർ ആവാനുള്ള തയാറെടുപ്പുകളിലാണ്. തന്റെ കരിയറിൽ ഓസ്ട്രേലിയയ്‌ക്കായി 145 ടെസ്റ്റുകളിൽ നിന്ന് 708 ടെസ്റ്റ് വിക്കറ്റുകൾ നേടിയ ഇതിഹാസ താരമാണ് ഷെയ്ൻ വോൺ.