ആലപ്പുഴ : ജില്ലയിൽ സർവ്വകക്ഷിയോഗം ചേരും. ജില്ലാ കളക്ടർ എ അലക്സാണ്ടറാണ് യോഗം വിളിച്ചിരിക്കുന്നത്. മന്ത്രിമാർ ഉൾപ്പെടെ യോഗത്തിൽ പങ്കെടുക്കും.
എസ്ഡിപിഐ, ബിജെപി നേതാക്കളുടെ കൊലപാതകങ്ങളുടെ പശ്ചാത്തലത്തിലാണ് തീരുമാനം. തിങ്കളാഴ്ച ഉച്ചയ്ക്ക് ശേഷം മൂന്ന് മണിയ്ക്കാണ് യോഗം ചേരുക. മന്ത്രി സജി ചെറിയാൻ, പി പ്രസാദ് എന്നിവർ യോഗത്തിൽ പങ്കെടുക്കുമെന്നാണ് വിവരം.
ഇരു കൊലപാതകങ്ങളുടെയും പശ്ചാത്തലത്തിൽ ജില്ലയിലെ സമാധാന അന്തരീക്ഷം തകർന്നിരിക്കുകയാണ്. ഈ സാഹചര്യത്തിലാണ് കളക്ടറുടെ അടിയന്തിര ഇടപടെൽ. കൂടുതൽ അക്രമ സംഭവങ്ങൾ ഉണ്ടാകാതിരിക്കാൻ പോലീസ് അതീവ ജാഗ്രതയാണ് പുലർത്തുന്നത്.
സംഘർഷ സാദ്ധ്യതയുള്ള മേഖലകളിൽ കൂടുതൽ പോലീസിനെ വിന്യസിച്ചിട്ടുണ്ട്. പട്രോളിംഗും പോലീസ് ശക്തമാക്കി. വാഹന പരിശോധന ഉൾപ്പെടെ കർശനമായി നടത്തുന്നുണ്ട്.
