അബുദാബി:പുതുവത്സരാഘോഷം കരുതലോടെ ആകണമെന്ന് അബുദാബി പോലീസ് നിർദ്ദേശിച്ചു;പ്രതിദിന കൊറോണ രോഗികളുടെ എണ്ണം വർദ്ധിക്കുന്ന സാഹചര്യത്തിലാണ് പുതുവത്സരാഘോഷം കരുതലോടെ വേണമെന്ന് അബുദാബി പോലീസ് മുന്നറിയിപ്പ് നൽകിയത്.
പൊതുജനങ്ങൾ ഉത്തരവാദിത്ത്വത്തോടെ പെരുമാറണമെന്ന് അധികൃതർ നിർദ്ദേശിച്ചു.ആഘോഷങ്ങളിൽ പങ്കെടുക്കുന്നവർ കൃത്യമായ കോറോണ വ്യവസ്ഥകൾ പാലിക്കുന്നുണ്ടെന്ന് ഉറപ്പാക്കണം. എല്ലായിടങ്ങളിലും മുഖാവരണം ധരിക്കണം. നിർദിഷ്ടസമയത്തിനുള്ളിൽ ലഭിച്ച പി.സി.ആർ. പരിശോധനാഫലം കരുതണം. സാനിറ്റൈസർ ഉപയോഗിക്കണം. ഏതെങ്കിലും തരത്തിലുള്ള രോഗലക്ഷണങ്ങൾ ഉള്ളവർ പൊതുയിടങ്ങളിലെ ആഘോഷങ്ങളിൽ പങ്കെടുക്കുന്നത് ഒഴിവാക്കണം.
നഗരത്തിലെ എല്ലാ ആഘോഷകേന്ദ്രങ്ങളിലും കൊറോണ വ്യവസ്ഥകൾ കർശനമായി പാലിക്കപ്പെടുന്നുണ്ടെന്ന് ഉറപ്പാക്കാനുള്ള സജ്ജീകരണങ്ങൾ ഏർപ്പെടുത്തിയതായി അബുദാബി പോലീസ് ക്രിമിനൽ സെക്യൂരിറ്റിവിഭാഗം ഡയറക്ടർ മേജർ ജനറൽ മുഹമ്മദ് സുഹൈൽ അൽ റാഷിദി പറഞ്ഞു.വാണിജ്യകേന്ദ്രങ്ങൾ, ഹോട്ടലുകൾ, ആഘോഷവേദികൾ, വിനോദകേന്ദ്രങ്ങൾ എന്നിവയെല്ലാം പോലീസ് നിയന്ത്രണത്തിലായിരിക്കും.
അബുദാബിയിലെ എല്ലാ പ്രവിശ്യകളിലും നടക്കുന്ന ആഘോഷങ്ങളുടെ സുരക്ഷയുറപ്പാക്കാൻ ബന്ധപ്പെട്ട വകുപ്പുകളുമായിചേർന്ന് പ്രവർത്തിക്കും. റോഡുമാർഗം അബുദാബിയിലേക്ക് പ്രവേശിക്കുന്നവർ ചെക് പോയന്റുകളിലെ പരിശോധനകൾ പൂർത്തിയാക്കണമെന്നും അദ്ദേഹം ഓർമിപ്പിച്ചു.
Comments