ന്യൂഡൽഹി: അസമിലെ കരിംഗഞ്ചിൽ നിന്നും ലഹരിക്കടത്ത് പിടികൂടി ബിഎസ്എഫ്. സംഭവത്തിൽ ഒരാൾ അറസ്റ്റിലായി. ഇയാളുടെ പക്കൽ നിന്നും 1.30 കോടി രൂപ വിലമതിക്കുന്ന 26,000 യാബ ടാബ്‌ലെറ്റുകളാണ് പിടികൂടിയത്.
കാലിഗഞ്ച് സ്വദേശിയായ 18കാരൻ മർഫൂജ അഹമ്മദാണ് ലഹരി കടത്താൻ ശ്രമിച്ചതെന്ന് ബിഎസ്എഫ് വ്യക്തമാക്കി. കോടിക്കണക്കിന് രൂപയുടെ നാർക്കോട്ടിക് ഡീൽ നടക്കുന്നുണ്ടെന്ന് വിവരം ലഭിച്ചതിനെ തുടർന്ന് ബിഎസ്എഫ് 7-ാം ബറ്റാലിയൻ നടത്തിയ പരിശോധനയിലാണ് പ്രതിയെ പിടികൂടിയത്.
മയക്കുമരുന്ന് കൂടാതെ ഒരു ഹ്യൂണ്ടായി ഇയോൺ കാറും അന്വേഷണ സംഘം കണ്ടെത്തിയിട്ടുണ്ട്. ഈ കാറിനുള്ളിൽ നിന്നാണ് യാബ ടാബ്‌ലെറ്റുകൾ ലഭിച്ചത്. പ്രതിയെയും പിടിച്ചെടുത്ത ലഹരി വസ്തുക്കളെയും കരിംഗഞ്ച് പോലീസിന് കൈമാറിയതായി ബിഎസ്എഫ് അറിയിച്ചു.
Comments