പിഴത്തുക 20 ലക്ഷത്തിൽ നിന്ന് രണ്ടു ലക്ഷമായി കുറയ്‌ക്കാം; പകരം ജൂഹി ചൗള സാമൂഹ്യ സേവനം നടത്തണമെന്ന് കോടതി

ന്യൂഡൽഹി: നടി ജൂഹി ചൗളയ്‌ക്ക് ചുമത്തിയ പിഴത്തുക കുറയ്‌ക്കാമെന്ന് ഡൽഹി ഹൈക്കോടതി.ഇരുപത് ലക്ഷം രൂപയുടെ പിഴ രണ്ടു ലക്ഷം രൂപയാക്കി കുറയ്‌ക്കാമെന്നാണ് ഡൽഹി ഹൈക്കോടതി വ്യക്തമാക്കിയിരിക്കുന്നത്. രാജ്യത്ത് 5ജി സർവ്വീസ് തുടങ്ങുന്നതിന് എതിരെ ഹർജി നൽകിയതിനാണ് കോടതി നടിക്ക് പിഴ വിധിച്ചത്.

5ജി ഗുരുതരമായ ആരോഗ്യപ്രശ്‌നങ്ങൾ സൃഷ്ടിക്കുമെന്നും ഇക്കാര്യത്തിൽ പഠനം നടത്തിയതിന് ശേഷം മാത്രമേ സേവനം തുടങ്ങാൻ അനുവദിക്കാവൂ എന്നാണ് ജൂഹി ചൗള ഹർജിയിൽ ആവശ്യപ്പെട്ടത്.ഇതൊരു അനാവശ്യ ഹർജിയാണെന്ന് വിലയിരുത്തിയ സിംഗിൾ ബെഞ്ച് ജൂഹി ചൗളയ്‌ക്ക് ഇരുപത് ലക്ഷം പിഴ ചുമത്തുകയായിരുന്നു.ഇതിനെതിരെ നടി നൽകിയ അപ്പീലിലാണ് നടപടി.

കോടതിച്ചെലവ് പൂർണമായും ഒഴിവാക്കാനാവില്ലെന്ന് ഡിവിഷൻ ബെഞ്ച് വ്യക്തമാക്കി.പിഴത്തുക ഇരുപത് ലക്ഷത്തിൽ നിന്ന് രണ്ട് ലക്ഷമാക്കി കുറയ്‌ക്കാമെന്നും പകരം ഡൽഹി ലീഗൽ അതോറിറ്റിക്കു വേണ്ടി ജൂഹി ചൗള പ്രചാരണ പരിപാടിയിൽ പങ്കടെുക്കണമെന്നും അതെങ്ങനെ വേണമെന്ന് ലീഗൽ അതോറിറ്റി പദ്ധതി തയ്യാറാക്കുമെന്നും കോടതി വിധിച്ചു.കേസ് വീണ്ടും ഈ മാസം 27 ന് പരിഗണിക്കും.