ന്യൂഡൽഹി: ഭീകരതയ്‌ക്കെതിരായ പോരാട്ടത്തിൽ ജമ്മുകശ്മീർ പോലീസ് നിർണ്ണായ പങ്ക് വഹിച്ചുവെന്ന് കേന്ദ്ര ആഭ്യന്തരമന്ത്രി അമിത് ഷാ. ധീരതയ്‌ക്കുള്ള പുരസ്‌കാരങ്ങൾ നേടിയ ഉദ്യോഗസ്ഥരെ അഭിനന്ദിച്ച് സംസാരിക്കുകയായിരുന്നു അദ്ദേഹം. രാജ്യത്തിന്റെ സമാധാനത്തിന് വേണ്ടി ജമ്മുപോലീസ് നിസ്വാർത്ഥം പ്രവർത്തിക്കുന്നുവെന്ന് അമിത് ഷാ പറഞ്ഞു.
തീവ്രവാദത്തിനെതിരായ ഇന്ത്യയുടെ പോരാട്ടത്തെ നയിക്കുന്നത് ജമ്മു പോലീസാണ്. 155 ജമ്മു പോലീസിനാണ് ഇന്ന് ധീരതയ്‌ക്കുള്ള അവാർഡുകൾ ലഭിച്ചത്. അവരെ ഓർത്ത് രാജ്യം എന്നും അഭിമാനിക്കുന്നു. ഇവരുടെ സേവനം രാജ്യത്തിനെന്നും ആവശ്യമാണെന്നും തീവ്രവാദത്തിനെതിരായ രാജ്യത്തിന്റെ പോരാട്ടത്തിൽ ഒഴിവാക്കാനാകാത്ത പ്രവർത്തനമാണ് ജമ്മുപോലീസിന്റേതെന്നും അമിത് ഷാ ട്വീറ്റ് ചെയ്തു.
ധീരരായ ഉദ്യോഗസ്ഥരെ അംഗീകരിക്കാനും ആദരിക്കാനും കേന്ദ്രസർക്കാർ പ്രതിജ്ഞാബദ്ധമാണെന്നും അമിത് ഷാ പറഞ്ഞു. രാഷ്‌ട്രപതിയുടെ പോലീസ് മെഡലിന് ഇത്തവണ 939 പേരാണ് അർഹരായത്. ഏറ്റവും കൂടുതൽ മെഡലുകൾ കരസ്ഥമാക്കിയത് ജമ്മുകശ്മീർ പോലീസാണ്. ജമ്മുകശ്മീരിൽ മാത്രം 189 പേരാണ് രാഷ്‌ട്രപതിയുടെ മെഡലിന് അംഗീകാരം നേടിയത്. ഇതിൽ 115 പേർ ജമ്മു പോലീസാണ്.
Comments