കൊറോണ കുറയുന്നു; രാജ്യത്ത് ഇന്ന് രണ്ട് ലക്ഷത്തിൽ താഴെ രോഗികൾ; കഴിഞ്ഞ ദിവസത്തേക്കാൾ 20 ശതമാനം കുറവ്; രോഗമുക്തി നിരക്ക് വർദ്ധിച്ചു

ന്യൂഡൽഹി: രാജ്യത്ത് പ്രതിദിന കൊറോണ രോഗികളുടെ എണ്ണത്തിൽ കുറവ്. കഴിഞ്ഞ 24 മണിക്കൂറിൽ 1,67,059 പേർക്കാണ് വൈറസ് ബാധ സ്ഥിരീകരിച്ചത്. പ്രതിദിന രോഗികളിൽ കഴിഞ്ഞ ദിവസത്തേക്കാൾ 20 ശതമാനത്തിന്റെ കുറവാണ് രേഖപ്പെടുത്തിയത്.

കഴിഞ്ഞ 24 മണിക്കൂറിൽ 1192 മരണമാണ് റിപ്പോർട്ട് ചെയ്തത്. രാജ്യത്ത് കൊറോണ മരണ സംഖ്യ ഉയർന്ന് തന്നെ നിൽക്കുകയാണെന്ന് കണക്കുകൾ വ്യക്തമാക്കുന്നു. പ്രതിദിന ടിപിആർ 11.69 ശതമാനമാണ്. ഇന്നലെ ഇത് 15.77 ശതമാനമായിരുന്നു. 2,54,076 പേർ കഴിഞ്ഞ ദിവസം രോഗമുക്തരായി. നിലവിൽ 17,43,059 പേരാണ് രോഗം ബാധിച്ച് ചികിത്സയിൽ കഴിയുന്നത്.

അതേസമയം, വരും ദിവസങ്ങളിലും രാജ്യത്തെ കൊറോണ കേസുകൾ കുറഞ്ഞാൽ അത് വളരെയേറെ ആശ്വാസകരമാകും. ജനുവരി 24 നും 30നുമിടയിൽ കൊറോണ ബാധിച്ച് മരിച്ചവരുടെ എണ്ണം 3770 ആണ്. ജനുവരി 17 നും 23 നുമിടയിൽ മരിച്ചവരുടെ എണ്ണം 2680 ആണ്. രാജ്യത്ത് ഇതുവരെ 1,66,68,48,204 വാക്‌സിൻ ഡോസുകൾ വിതരണം ചെയ്തതായി ആരോഗ്യമന്ത്രാലയം അറിയിച്ചു.