ദുബായ്: കേന്ദ്ര ബജറ്റിനെ പ്രശംസിച്ച് പ്രമുഖ വ്യവസായി എംഎ യൂസഫലി. ഡിജിറ്റൽ പരിവർത്തനത്തിന് ഊന്നൽ നൽകുന്ന ബജറ്റ് സുതാര്യത ഉറപ്പാക്കുമെന്നും വളരെ ശക്തമായ ബജറ്റ് പ്രഖ്യാപനമാണ് നടന്നതെന്നും ലുലു ഗ്രൂപ്പ് ചെയർമാൻ എം എ യൂസഫലി പറഞ്ഞു.
‘നമ്മുടെ രാഷ്‌ട്രത്തിന്റെ പ്രധാന ഘടകങ്ങളായ കൃഷി, ഗ്രാമീണ വികസനം, അടിസ്ഥാന സൗകര്യ വികസനം എന്നിവയ്‌ക്ക് വ്യക്തവും ശക്തവുമായ ഊന്നൽ നൽകുന്ന ബജറ്റാണിത്. വികസന പ്രവർത്തനങ്ങൾക്ക് ഊന്നൽ നൽകിയുള്ള ബജറ്റ് രാജ്യത്തിന്റെ മൊത്തത്തിലുള്ള വികസന പ്രവർത്തനങ്ങൾ ദ്രുതഗതിയിലാക്കുമെന്ന് യൂസഫലി പ്രതികരിച്ചു.
വെല്ലുവിളി നിറഞ്ഞതും അതിവേഗം വികസിച്ച് കൊണ്ടിരിക്കുന്നതുമായ നിലവിലെ സാഹചര്യത്തിൽ ഡിജിറ്റൽ രൂപ, ബ്ലോക്ക്ചെയിൻ സാങ്കേതികവിദ്യ, ഡിജിറ്റൽ ബാങ്കിംഗ്, ഡിജിറ്റൽ യൂണിവേഴ്സിറ്റി, ഇ-പാസ്പോർട്ട് തുടങ്ങി ഡിജിറ്റൽ പരിവർത്തനങ്ങളിലുള്ള ഗവൺമെന്റിന്റെ ഊന്നൽ, സുതാര്യമായ സമ്പദ് വ്യവസ്ഥ സൃഷ്ടിക്കാനുള്ള ഇന്ത്യയുടെ കുതിപ്പിന് വേഗം കൂട്ടാൻ സഹായിക്കുമെന്നും അദ്ദേഹം പറഞ്ഞു. ഈ ബജറ്റിൽ പുതിയ നികുതികളൊന്നും ഏർപ്പെടുത്തിയിട്ടില്ല എന്നത് തീർച്ചയായും വലിയ ആശ്വാസമാണെന്നും അദ്ദേഹം കൂട്ടിച്ചേർത്തു.
Comments