സിറിയയിൽ യുഎസ് സേന നടത്തിയ ആക്രമണത്തിൽ ഐഎസ് നേതാവ് അബു ഇബ്രാഹിം കൊല്ലപ്പെട്ടതായി പ്രസിഡന്റ് ജോ ബൈഡൻ

വാഷിങ്ടൺ: വടക്കുപടിഞ്ഞാറൻ സിറിയയിൽ അമേരിക്ക നടത്തിയ ആക്രമണത്തിൽ ഇസ്ലാമിക് സ്റ്റേറ്റ് ഗ്രൂപ്പിന്റെ ഉന്നത നേതാവ് അബു ഇബ്രാഹിം അൽ-ഹാഷിമി അൽ-ഖുറൈഷി കൊല്ലപ്പെട്ടതായി അമേരിക്ക. അമേരിക്കൻ സൈന്യം നടത്തിയ ആക്രമണത്തിൽ ഐഎസ് നേതാവിനെ വധിച്ചതായി യുഎസ് പ്രസിഡന്റ് ജോ ബൈഡൻ അവകാശപ്പെട്ടു. വ്യാഴാഴ്ച യുഎസ് പ്രസിഡന്റ് പുറത്തിറക്കിയ പ്രസ്താവന പ്രകാരം, സിറിയയിൽ തീവ്രവാദവിരുദ്ധ ഓപ്പറേഷൻ നടത്തുന്നതിന് അദ്ദേഹം യുഎസ് സൈനികർക്ക് അനുമതി നൽകിയിരുന്നു. ഇസ്ലാമിക ഭീകര സംഘടനകളിൽ നിന്ന് അമേരിക്കൻ ജനതയെയും യുഎസ് സഖ്യകക്ഷികളെയും സംരക്ഷിക്കാൻ സൈനികർക്ക് നിർദ്ദേശം നൽകിയതായി ബൈഡൻ വ്യക്തമാക്കി.

‘ഇന്നലെ രാത്രി എന്റെ നിർദ്ദേശപ്രകാരം, വടക്കുപടിഞ്ഞാറൻ സിറിയയിലെ യുഎസ് സൈനിക സേന അമേരിക്കൻ ജനതയെയും ഞങ്ങളുടെ സഖ്യകക്ഷികളെയും സംരക്ഷിക്കുന്നതിനും ലോകത്തെ സുരക്ഷിതമായ സ്ഥലമാക്കുന്നതിനുമായി ഒരു ഭീകരവിരുദ്ധ പ്രവർത്തനം വിജയകരമായി നടത്തി,’ ബൈഡൻ പറഞ്ഞു.

”നമ്മുടെ സായുധ സേനയുടെ വൈദഗ്ധ്യത്തിനും ധീരതയ്‌ക്കും നന്ദി, ഞങ്ങൾ ഐഎസിന്റെ നേതാവ് അബു ഇബ്രാഹിം അൽ-ഹാഷിമി അൽ-ഖുറൈഷിയെ യുദ്ധക്കളത്തിൽ നിന്ന് പുറത്താക്കി,” ബൈഡൻ കൂട്ടിച്ചേർത്തു. ഭീകരവിരുദ്ധ ഓപ്പറേഷന്റെ ഭാഗമായിരുന്ന എല്ലാ അമേരിക്കൻ സൈനികരെയും സുരക്ഷിതമായി തിരിച്ചെത്തിയതായി അദ്ദേഹം അറിയിച്ചു. യുഎസ് സേനയുടെ നേതൃത്വത്തിലുള്ള ‘വിജയകരമായ ഓപ്പറേഷനെ’ കുറിച്ച് പെന്റഗൺ വ്യാഴാഴ്ച പുലർച്ചെ അറിയിച്ചു. അമേരിക്കൻ ഉദ്യോഗസ്ഥർ കൃത്യമായ ലക്ഷ്യവും ഓപ്പറേഷനുകളിലെ നാശനഷ്ടങ്ങളും വെളിപ്പെടുത്തിയിട്ടില്ലെങ്കിലും, നിരവധി പുരുഷന്മാരുടെയും സ്ത്രീകളുടെയും കുട്ടികളുടെയും മൃതദേഹങ്ങൾ കണ്ടെത്തിയതായി പ്രാദേശിക പത്രപ്രവർത്തകരും സാമൂഹിക സഹായ ഗ്രൂപ്പുകളും അവകാശപ്പെട്ടു.

അസോസിയേറ്റഡ് പ്രസിന്റെ റിപ്പോർട്ട് പ്രകാരം കൊല്ലപ്പെട്ടവരിൽ സാധാരണക്കാരും തീവ്രവാദികളും ഉൾപ്പെടുന്നു. ദൗത്യം വിജയകരമാണെന്ന് പെന്റഗൺ പ്രസ് സെക്രട്ടറി ജോൺ കിർബി പ്രസ്താവിച്ചു. 2019 ന് ശേഷം പ്രവിശ്യയിൽ നടക്കുന്ന ഏറ്റവും വലിയ റെയ്ഡായിരുന്നു ഇന്നത്തെ ഓപ്പറേഷൻ. ‘യുഎസിൽ ആളപായം ഉണ്ടായിട്ടില്ല. കൂടുതൽ വിവരങ്ങൾ ലഭ്യമാകുന്ന മുറയ്‌ക്ക് നൽകും,’ കിർബി വ്യാഴാഴ്ച പ്രസ്താവനയിൽ പറഞ്ഞു.

തുർക്കി അതിർത്തിക്ക് സമീപം രണ്ട് മണിക്കൂറോളം ഓപ്പറേഷൻ നടത്തിയതായി വാർത്താ ഏജൻസി റിപ്പോർട്ട് ചെയ്തു. സിറിയൻ ആഭ്യന്തരയുദ്ധത്തിൽ കുടിയൊഴിപ്പിക്കപ്പെട്ട ആളുകൾക്കുള്ള ഒരു പ്രധാന പാർപ്പിട പ്രദേശമാണിതെന്ന് നിവാസികൾ പറഞ്ഞു. അതേസമയം, റെയ്ഡ് നടന്ന സ്ഥലത്തിന് സമീപം നിരവധി ആളുകളുടെ ശരീരഭാഗങ്ങൾ ചിതറിക്കിടക്കുന്നത് കണ്ടതായി മറ്റ് താമസക്കാർ അന്താരാഷ്‌ട്ര വാർത്താ ഏജൻസി എപിയോട് പറഞ്ഞു.