ശ്രീനഗർ: ശ്രീനഗർ ആസ്ഥാനമായുള്ള പ്രമുഖ വാർത്താ പോർട്ടലായ ദി കശ്മീർ വാലയുടെ എഡിറ്റർ ഫഹദ് ഷായെ പോലീസ് കസ്റ്റഡിയിലെടുത്തു. തീവ്രവാദ പ്രവർത്തനങ്ങളെ മഹത്വവൽക്കരിച്ച് ഫേസ്ബുക്കിലൂടെ ദേശവിരുദ്ധ ഉള്ളടക്കം പ്രചരിപ്പിച്ചതിനും പ്രകോപനപരമായ ഉള്ളടക്കം സമൂഹമാദ്ധ്യമങ്ങളിലൂടെ പ്രചരിപ്പിച്ചതിനുമാണ് കേസ്.
വാർത്താ പോർട്ടലിന്റെ ഉള്ളടക്കത്തെ സംബന്ധിച്ച് ഇതിന് മുൻപ് മൂന്ന് തവണ പോലീസ് ഫഹദിനെ വിളിച്ച് വരുത്തി ചോദ്യം ചെയ്തിരുന്നു. കഴിഞ്ഞ ജനുവരി 31 ന് ചോദ്യം ചെയ്ത് വിട്ടയച്ചിരുന്നു. ഇതിന് പിന്നാലെ ഈ മാസം ഒന്നാം തിയ്യതി ഇയാളെ പോലീസ് കൂടുതൽ ചോദ്യം ചെയ്യലിന് വിളിപ്പിക്കുകയും മൂന്ന് ദിവസങ്ങൾക്ക് ശേഷം കസ്റ്റഡിയിലെടുക്കുകയുമായിരുന്നു.
ഓൺലൈൻ വാർത്താ പോർട്ടലായ ദി കശ്മീർ വാലയുടെ ചീഫ് എഡിറ്ററാണ് ഫഹദ് ഷാ.കഴിഞ്ഞ മാസം കശ്മീർ വാലയിലെ റിപ്പോർട്ടറായ സജാദ് ഗുൽ അറസ്റ്റിലായിരുന്നു. പ്രകോപനപരമായ ഉള്ളടക്കങ്ങൾ പ്രചരിപ്പിച്ചതിനും ജനങ്ങളിൽ ശത്രുത പടർത്താൻ ശ്രമിച്ചതിനുമാണ് ഇയാൾക്കെതിരെ കേസെടുത്തിരുന്നത്.
Comments